भोटेकोशी बाढीमा सर्वस्व गुमाएकी विष्णुकुमारीको केएमसीमा निःशुल्क मिर्गौला प्रत्यारोपण सफल, स्वस्थ भई घर फर्किइन्
काठमाडौँ। भदौ १० गते भोटेकोशीमा आएको विनाशकारी बाढीबाट सर्वस्व गुमाएकी ४१ वर्षीया विष्णुकुमारी डंगोल काठमाडौँ मेडिकल कलेज (केएमसी) मा सफलतापूर्वक निःशुल्क मिर्गौला प्रत्यारोपणपछि पूर्ण रूपमा स्वस्थ भई डिस्चार्ज भएकी छन्। उनलाई पति राजकुमार डंगोलले मिर्गौला दान गरेका हुन्।
बाढीले घरबारका साथै उपचारका लागि जोगाएको रकमसमेत बगाएपछि जीवन र मृत्युको दोसाँधमा पुगेकी विष्णुकुमारीको दयनीय अवस्थाबारे थाहा पाएपछि नेपाली कांग्रेसका नेता तथा केएमसीका सञ्चालक डा. सुनीलकुमार शर्माले सम्पूर्ण उपचार तथा खानपिन निःशुल्क गराउने घोषणा गरेका थिए। त्यसलगत्तै ट्रान्सप्लान्ट सर्जन डा. सुरेश महर्जन, डा. विजयमानसिंह कटुवाल, डा. अनिल पोख्रेलसहितको टोलीले प्रत्यारोपण प्रक्रिया अघि बढाएको थियो।
अस्पतालबाट घर फर्किंदै गर्दा डंगोल दम्पतीले चिकित्सक टोली र डा. शर्माप्रति भावुक हुँदै आभार व्यक्त गरे। राजकुमारले आफूहरूले वास्तविक जीवनमा भगवान् भेटेको अनुभव सुनाउँदै जीवनदान दिएकोमा कोटी-कोटी नमन गरे। केएमसीमा हालसम्म गरिएका सबै ८६ वटा मिर्गौला प्रत्यारोपण शतप्रतिशत सफल भएका छन्, जसमध्ये विष्णुकुमारी ८६ औँ बिरामी हुन्।
