काठमाडौँ। गैरआवासीय नेपाली संघ (एनआरएनए) का पूर्वअध्यक्ष शेष घले र उनकी पत्नी जमुना गुरुङले भोटेकोशी बाढीबाट प्रभावित बालबालिकाहरूका लागि ५७ करोड ८५ लाख रुपैयाँसम्मको दीर्घकालीन सहयोग घोषणा गरेका छन्। घले दम्पतीको परोपकारी संस्था ‘एमआईटी ग्रुप फाउन्डेसन’ ले राष्ट्रिय बाल अधिकार परिषद्सँग समझदारी पत्र (MoU) मा हस्ताक्षर गर्दै उक्त सहयोग रकम खर्च गर्ने जनाएको छ।
सहयोग कार्यक्रमअनुसार बाढीका कारण प्रभावित १८ वर्षमुनिका बालबालिकाहरूलाई कक्षा १२ सम्मको शिक्षा, आवास, खाना, कपडा र स्वास्थ्य उपचारजस्ता आधारभूत आवश्यकताहरू पूरा गरिनेछ। विपद्का बेला तत्काल उद्धार मात्र नभई बालबालिकाको भविष्य सुरक्षित गर्न दीर्घकालीन रूपमा साथ दिने उद्देश्यले यो सहयोग गर्न लागिएको घलेले सामाजिक सञ्जालमार्फत स्पष्ट पारेका छन्।
बाढीले कतिपय बालबालिकाको जीवनमा अपूरणीय क्षति पुर्याएको उल्लेख गर्दै घलेले यो सहयोग रकममा मात्र सीमित नभएर बालबालिकालाई कठिन समयमा कोही साथमै छ भन्ने विश्वास दिलाउन केन्द्रित रहने बताएका छन्। बाढी घटे पनि बालबालिकाले भोग्नुपर्ने समस्या दीर्घकालीन हुने भएकाले उनीहरूले पाउने अवसरमा कमी आउन नदिन कक्षा १२ सम्म सहयोग जारी रहनेछ।
