काठमाडौँ। काठमाडौँ उपत्यकामा एलपी ग्यासको अभाव बढेपछि उपत्यकाबाहिरका जिल्लाहरूबाट दैनिक औसत ३५ हजार सिलिन्डर काठमाडौँ पठाउन थालिएको छ।
कृष्णभिरलगायत पृथ्वी राजमार्गका विभिन्न खण्डमा पहिरोका कारण सडक अवरुद्ध भएपछि ग्यास बुलेट सिधै काठमाडौँ आउन सकेका छैनन्। जसका कारण काठमाडौँबाहिरका ग्यास उद्योगहरूबाटै सिलिन्डर भरेर उपत्यका भित्र्याउन थालिएको उद्योगीहरूले बताएका छन्।
नेपाल एलपी ग्यास उद्योग सङ्घका अध्यक्ष दिवान चन्दका अनुसार उपत्यकामा ग्यासको अभाव हुन नदिन चितवन, मकवानपुर, बारा, पर्सालगायतका क्षेत्रमा रहेका उद्योगहरूबाट सिलिन्डर भरेर काठमाडौँ पठाउने व्यवस्था मिलाइएको छ।
अध्यक्ष चन्दका अनुसार बिहीबार २४ हजार, शुक्रबार ३४ हजार र शनिबार ३५ हजार ग्यास सिलिन्डर काठमाडौँ पठाइएको छ। सडक अवरोधका कारण भारतीय सीमाबाट आउने ग्यास बुलेट रोकिए पनि बाहिरका जिल्लाबाट आपूर्ति सहज बनाएर काठमाडौँको अभाव हटाउने प्रयास भइरहेको उद्योगीहरूले जनाएका छन्।
