काठमाडौँ, भदौ १८ : लक्ष्मी सनराइज बैंकले भोटेकोशी र त्रिशूली नदीमा हालै आएको विनाशकारी बाढीबाट प्रभावित समुदायको उद्धार, राहत तथा दीर्घकालीन पुनःस्थापनाका लागि प्रधानमन्त्री दैवी प्रकोप उद्धार कोषमा रु. ३ करोड २४ लाख (३.२४ करोड) आर्थिक सहयोग प्रदान गरेको छ।
हालैको बाढीका कारण रसुवा, नुवाकोट, धादिङ, गोरखा र चितवनलगायतका जिल्लाहरूमा जनधनको ठूलो क्षति हुनुका साथै सर्वसाधारणको जीविकोपार्जन, आवास र पूर्वाधारमा गम्भीर असर पुगेको छ।
तत्काल गरिने प्राथमिक उद्धार र राहतका कार्यहरू पश्चात् अब प्रभावित क्षेत्रमा पुनःस्थापना र पुनर्निर्माणका कामहरू प्राथमिकताका साथ अघि बढाउनुपर्ने आवश्यकतालाई ध्यानमा राख्दै बैंकले यो सहयोग हस्तान्तरण गरेको जनाएको छ।
लक्ष्मी सनराइज बैंकले यस विपद्का कारण आफन्त, घरजग्गा तथा रोजगारी गुमाएका सम्पूर्ण पीडितहरूप्रति समवेदना व्यक्त गर्दै उद्धार तथा व्यवस्थापनमा निरन्तर खटिएका सरकारी निकाय, सुरक्षाकर्मी, स्वयंसेवक तथा स्थानीय समुदायको सराहना गरेको छ। बैंकले आगामी दिनमा पनि प्राकृतिक विपद्बाट प्रभावित समुदायको पुनःस्थापना र दीगो पुनर्निर्माणका प्रयासमा हातेमालो गरिरहने प्रतिबद्धता जनाएको छ।
