काठमाडौँ। प्रमुख प्रतिपक्षी दल नेपाली कांग्रेसले बाढी प्रभावित क्षेत्रमा सुरुङ तथा भग्नावशेषमा फसेका नागरिकहरूको जीवितै उद्धारका लागि अन्तर्राष्ट्रिय उद्धारकर्ता तथा विशेषज्ञ टोलीलाई तत्काल परिचालनको अनुमति दिन सरकारसँग माग गरेको छ।
कांग्रेस संसदीय दलका नेता भीष्मराज आङदेम्बेले प्रधानमन्त्री तथा मन्त्रिपरिषद्को कार्यालय पुगेर प्रधानमन्त्री बालेन्द्र शाहलाई भेट्दै उक्त आग्रहसहितको ध्यानाकर्षण पत्र बुझाएका हुन्।
नुवाकोटका बाढी प्रभावित क्षेत्रहरूको स्थलगत निरीक्षण गरी काठमाडौँ फर्किएका आङदेम्बेले यसअघि गृहमन्त्री सुधन गुरुङसँग पनि भेटघाट गरेका थिए। प्रधानमन्त्रीसँगको भेटमा उनले उद्धार कार्यलाई थप चुस्त बनाउन विभिन्न सुझावहरू प्रस्तुत गरेका छन्:
अन्तर्राष्ट्रिय उद्धारकर्ताको सहयोग:जलविद्युत् आयोजनाका सुरुङ तथा भग्नावशेषभित्र अझै पनि नागरिक फसेको सम्भावना उच्च रहेकाले जीवितै उद्धारका लागि अत्याधुनिक प्रविधिसहितका अन्तर्राष्ट्रिय विशेषज्ञ टोली खटाउनुपर्ने।
छुट्टाछुट्टै हवाई उद्धार युनिट: नेपाली सेनाले गरिरहेको उद्धार कार्य सराहनीय रहेको उल्लेख गर्दै उद्धारलाई अझ प्रभावकारी बनाउन रसुवा र नुवाकोटका लागि छुट्टाछुट्टै हेलिकप्टर उद्धार युनिट गठन गरी परिचालन गर्नुपर्ने।
सरकारले उद्धार र राहतमा प्राथमिकता दिनुपर्ने कामहरूबारे उनले बुँदागत रूपमा प्रधानमन्त्री शाहको ध्यानाकर्षण गराएका छन्।
