काठमाडौँ — रसुवा बाढीका कारण बहएर चितवनस्थित नारायणी नदी क्षेत्रमा फेला परेका २३३ वटा शवमध्ये हालसम्म चार जनाको मात्रै पहिचान (सनाखत) भएको छ।
जिल्ला प्रहरी कार्यालय चितवनका प्रमुख प्रहरी उपरीक्षक (एसपी) रामेश्वर पौडेलका अनुसार सनाखत भएकामध्ये तीन जनाको शव आफन्तले बुझिसकेका छन् भने एक जनाका आफन्त विदेशबाट फर्कने क्रममा रहेकाले बुझाउन बाँकी छ।
सनाखत भएका मृतकहरू:
असई रामकाजी पौडेल: बेत्रावती प्रहरी चौकीमा कार्यरत असई पौडेलको शव आफन्तले बुझेर शुक्रबार देवघाटमा दाहसंस्कार गरेका छन्। बाढी आउँदा चौकीका ९ जना भाग्न सफल भए पनि पौडेल बेपत्ता भएका थिए।
रमेश मगर (मकवानपुर): परिवारले शव बुझिसकेका छन्।
कविराज चौधरी (बाँके): आफन्तले शुक्रबार नै शव बुझेका छन्।
भुवन थापा मगर (रसुवा): सनाखत भइसकेको र विदेशमा रहेका आफन्त शनिबार फर्किएपछि शव बुझाउने तयारी छ।
अस्पतालमा ठाउँ अभाव: उद्योग वाणिज्य संघमा ‘आइस’सहित ७७ शव र मानव अङ्ग
चितवनमा हाल रहेका २३० शवमध्ये १५८ वटा भरतपुर अस्पतालमा राखिएको छ। बाँकी शवहरू नारायणी अस्पताल, नेशनल सिटी र सामुदायिक अस्पतालमा व्यवस्थापन गरिएको छ।
अस्पतालका शवगृह (मर्चरी) भरिएपछि ७७ वटा शव उद्योग वाणिज्य संघको भवन परिसरमा विशेष ‘आइस’ (बरफ) को व्यवस्था गरी राखिएको एसपी पौडेलले जानकारी दिए। यसका साथै बाढीले बगाएर ल्याएका ६२ वटा काटिएका हात, खुट्टा र पन्जासहितका मानव अङ्गहरूसमेत उद्योग वाणिज्य संघकै परिसरमा सुरक्षित राखिएको छ।
बाढीमा मृत्यु हुनेको संख्या ५७९ पुग्यो
गत बुधबार बिहान रसुवाको भोटेकोसीमा आएको भीषण बाढीका कारण हालसम्म मृत्यु हुनेको संख्या ५७९ पुगेको छ। अझै पनि सयौँ नागरिक बेपत्ता रहेकाले उनीहरूको खोजी तथा उद्धार कार्य तीव्र पारिएको छ।
