काठमाडौँ — नेकपा (एमाले) भित्र समग्र नीति र नेतृत्व पुनर्गठनको मुद्दा प्रक्रियागत तथा राजनीतिक रूपमा झन् पेचिलो बन्दै गएको छ। उपाध्यक्ष विष्णु पौडेल र महासचिव शंकर पोखरेललगायतका नेताहरूले विधान महाधिवेशन वा महाधिवेशन प्रतिनिधि परिषद्मार्फत नीति तथा नेतृत्व पुनर्गठन गर्नुपर्ने प्रस्ताव अघि सारेका छन्। तर, अध्यक्ष केपी शर्मा ओलीले भने पुनर्गठनको साटो ‘पुनर्जागरण’ अभियान चलाउनुपर्ने अडान राख्दै आएका छन्।
उपाध्यक्ष रामबहादुर थापा संयोजकत्वको कार्यदलका तर्फबाट महासचिव पोखरेलले १३ वटा प्रदेश तथा विभागीय भेलाका सुझाव समेटेर करिब सय पृष्ठको प्रतिवेदन तयार पारेका छन्। उक्त प्रतिवेदनमा निश्चित उमेर हद र कार्यकाल तोक्ने लगायतका विषय समेटिएका छन्। यद्यपि, अध्यक्ष ओलीले भने पार्टीमा महासंकट नपरी पुनर्गठन आवश्यक नरहेको र विशेष महाधिवेशन वा प्रतिनिधि परिषद्को कुरा बेमौसमी बाजा भएको भन्दै कडा असहमति जनाएका छन्।
पार्टी विधान अनुसार विधान महाधिवेशन वा विशेष महाधिवेशन बोलाउन केन्द्रीय कमिटीको निर्णय वा दुईतिहाइ जिल्ला कमिटी र बहुमत महाधिवेशन प्रतिनिधिको हस्ताक्षर आवश्यक पर्छ। केन्द्रीय कमिटी तथा प्रतिनिधिहरूमा अध्यक्ष ओली पक्षकै स्पष्ट बहुमत रहेकाले पुनर्गठन पक्षधरका लागि प्रक्रियागत रूपमा यो मुद्दा अघि बढाउन असहज देखिएको छ। आगामी भदौ अन्तिम साता बस्ने केन्द्रीय कमिटी बैठकले यस विषयमा औपचारिक निर्णय लिने तयारी गरेको छ।
