सङ्घीय संसद्का दुवै सदन (प्रतिनिधिसभा र राष्ट्रियसभा) को बैठक नभएको मौकामा आज विषयगत समितिहरू एकाएक सक्रिय बनेका छन्। प्रतिनिधिसभाको बैठक भदौ ८ गते र राष्ट्रियसभाको बैठक शुक्रबारका लागि तय गरिएकाले आज एकै दिन नौ वटा संसदीय समितिको बैठक बस्न लागेको हो।
आज बस्ने प्रमुख संसदीय समितिहरू र तिनका कार्यसूची यस प्रकार रहेका छन्:
अर्थ समिति (बिहान ११ बजे): अर्थमन्त्री र अर्थसचिवको उपस्थितिमा ‘नेपाल राष्ट्र बैङ्क ऐन, २०५८ लाई संशोधन गर्न बनेको विधेयक’माथि दफावार छलफल हुने।
अन्तर्राष्ट्रिय सम्बन्ध र पर्यटन समिति (बिहान ११ बजे): ‘पर्यटन विधेयक, २०८१’ का सम्बन्धमा होटल एसोसिएसन नेपाल (हान) लगायतका सरोकारवालाहरूसँग छलफल गरिने।
राज्य व्यवस्था तथा सुशासन समिति (बिहान ११ बजे): अख्तियार दुरुपयोग अनुसन्धान आयोगका पदाधिकारीहरूसँग आयोगको काम कारबाहीलगायतका विषयमा छलफल हुने।
उद्योग, वाणिज्य र श्रम तथा उपभोक्ता हित समिति (बिहान १० बजे): समितिमा परेका विभिन्न उजुरीहरूमाथि छलफल गरिने।
कृषि तथा प्राकृतिक स्रोत समिति (बिहान १० बजे): रासायनिक मलको प्रयोग क्रमशः घटाउँदै प्राङ्गारिक मलको उत्पादन र बिक्री वितरण सुधार गर्ने विषयमा मल उत्पादकहरूसँग छलफल हुने।
पूर्वाधार विकास समिति (बिहान १० बजे): अधिकार सम्पन्न बागमती सभ्यता एकीकृत विकास समितिअन्तर्गतको ‘बागमती ब्युटिफिकेसन आयोजना’बारे समीक्षा गरिने।
शिक्षा, स्वास्थ्य तथा सूचना प्रविधि समिति (बिहान १० बजे): ‘राष्ट्रिय विधि विज्ञान प्रयोगशाला विधेयक, २०८१’ का विषयमा छलफल हुने।
सार्वजनिक लेखा समिति (बिहान १० बजे): नेपालले प्राप्त गर्ने वैदेशिक सहायताको लेखापरीक्षण सम्बन्धमा छलफल हुने।
विधायन व्यवस्थापन समिति (अपराह्न १ बजे): विधायिकी अन्तरसम्बन्धका विषयमा गाउँपालिका राष्ट्रिय महासङ्घका अध्यक्ष र कार्यकारी निर्देशकसँग छलफल गरिने कार्यसूची रहेको छ।
