मिर्मिरे अनलाइन
काठमाडौँ, साउन २४ (८ अगस्ट २०२६)
इरानको इस्लामिक रिभोलुसनरी गार्ड कर्प्स (IRGC) ले रणनीतिक रूपमा अत्यन्तै महत्त्वपूर्ण मानिने होर्मुज जलडमरूमध्य (Strait of Hormuz) पुनः खोल्ने विषय पूर्ण रूपमा अमेरिकामाथि नै निर्भर रहेको बताएको छ। अमेरिकाले इरानका सबै शर्तहरू पूर्ण रूपमा स्वीकार गरेमा मात्र होर्मुजको जलमार्ग खोलिने चेतावनी इरानी सेनाले दिएको छ।
इरान-ओमानबीच भएको सम्झौतापछि होर्मुज जलमार्ग खुल्ने भन्ने खबरहरूलाई खण्डन गर्दै IRGC ले उक्त दाबीलाई अस्वीकार गरिदिएको छ। पछिल्ला केही दिनदेखि इरान र ओमानबीचको वार्तापछि होर्मुज खुल्ने आशामा रहेको ट्रम्प प्रशासनका लागि इरानको यो भनाइलाई ठूलो धक्काका रूपमा हेरिएको छ।
इरानी सरकारी समाचार एजेन्सी तास्निमका अनुसार IRGC का प्रवक्ता सरदार मोहेबीले होर्मुज जलडमरूमध्य खोल्ने विषय इरानको ‘विशेष प्रक्रिया र शर्तहरूमा’ आधारित रहेको र यसको ओमानसँग भइरहेको वार्तातर्फ कुनै सम्बन्ध नरहेको स्पष्ट पारेका छन्। “हाम्रा लागि होर्मुज जलडमरूमध्य केवल व्यापारिक मार्ग मात्र होइन, यो भौगोलिक र रणनीतिक शक्तिको एउटा महत्त्वपूर्ण हिस्सा हो,” मोहेबीले भने।
प्रवक्ता मोहेबीले अगाडि भनेका छन् कि यो जलमार्ग खोल्नका लागि अमेरिकाले “इरानका शर्तहरू पूर्ण रूपमा मान्नुपर्छ र क्षेत्रीय मामिलाहरूमा हस्तक्षेप गर्न बन्द गर्नुपर्छ।” अमेरिकाले इरानका शर्तहरू स्वीकार गरेकै क्षण निश्चित रूपमा होर्मुज जलडमरूमध्य खुला गरिने उनले बताए।
