सत्तारूढ राष्ट्रिय स्वतन्त्र पार्टी (रास्वपा) का सांसद मनिष झाले परिवर्तनको महान् जनादेश पाएको सरकारमा कोही पनि एक्लो नरहेको बताएका छन्।
प्रधानमन्त्री बालेन शाहले शुक्रबार मध्यराति सामाजिक सञ्जालमा ‘कहिलेकाहीँ एक्लै लड्नुपर्छ’ भन्दै लेखेको भावुक स्टाटसलाई लक्षित गर्दै सांसद झाले सिङ्गो पार्टी र जनप्रतिनिधिहरू सरकारको साथमा रहेको प्रस्ट पारेका हुन्।
शनिबार सामाजिक सञ्जाल एक्स (ट्विटर) मार्फत प्रतिक्रिया दिँदै सांसद झाले लेखेका छन्:
“परिवर्तनका लागि यो महान् जनादेश पाएको सरकारमा कोही एक्लो छैन। हामी सबै साथमा छौँ।”
‘एक्लै लड्नुपर्छ’ भन्ने बालेनको स्टाटस र झाले दिएको ढाडस
संसद्मा सत्तारूढ दलकै सांसदहरूबाट आलोचना भएपछि प्रधानमन्त्री बालेन शाहले शुक्रबार मध्यराति लेखेका थिए— “सुनेको र देखेकोभन्दा वास्तविकता कहिलेकाहीँ फरक हुन सक्छ। कहिलेकाहीँ एक्लै लड्नुपर्छ। यो पहिलो चोटि होइन।”
प्रधानमन्त्रीको उक्त अभिव्यक्तिपछि सांसद झाले सरकारलाई खबरदारी र समर्थन दुवै जारी रहने स्पष्ट पारेका हुन्।
“हिजो सदनमा भनेको झैँ, नियत र आशयमा शङ्का छैन तर सुधार गर्नै पर्ने केही पक्ष छन्,” सांसद झाले भनेका छन्, “यो महान् ऐतिहासिक अवसर खेर नजाओस् भनेर सजग रहने र सचेत गराउने काम निरन्तर रहनेछ। जननिर्वाचित सरकार जनताको साथमा हुनुपर्छ र म सरकारको साथमा छु। यहाँ कोही एक्लो छैन।”
सांसद झाले संसद्मा उठाएका विषयहरू सरकारलाई सचेत गराउन र सुधारका लागि भएको दोहोर्याउँदै ऐतिहासिक जनादेश पाएको सरकारलाई असफल हुन नदिइने प्रतिबद्धता व्यक्त गरेका छन्।
