काठमाडौँ । सर्वोच्च अदालतले मुद्दा पुनरवलोकनका लागि अनुमति (निस्सा) दिएपछि नेपाली कांग्रेसभित्रको आन्तरिक विवादले नयाँ मोड लिएको छ। यसअघि विशेष महाधिवेशनबाट आएको गगन थापा नेतृत्वको कार्यसमितिलाई वैधता दिने सर्वोच्चकै फैसला पुनरवलोकन हुने भएपछि इतर समूह (संस्थापन पक्ष) उत्साहित बनेको छ। प्रधानन्यायाधीश डा. मनोजकुमार शर्मासहित न्यायाधीशहरू नित्यानन्द पाण्डेय र श्रीकान्त पौडेलको पूर्ण इजलासले गत वैशाख ४ गतेको फैसला पुनरवलोकन गर्न आदेश जारी गरेको हो। पूर्वसभापति शेरबहादुर देउवा र पूर्वउपसभापति पूर्णबहादुर खड्काले निर्वाचन आयोगको निर्णय र त्यसलाई सदर गर्ने सर्वोच्चको अघिल्लो फैसला त्रुटिपूर्ण रहेको दाबी गर्दै पुनरवलोकन निवेदन दिएका थिए। न्यायिक निरूपण र इतर पक्षको प्रतिक्रियासर्वोच्चको यो आदेशपछि पूर्वउपसभापति पूर्णबहादुर खड्काले अदालतको निर्णयले पार्टीको सम्पूर्ण एकतालाई बल पुर्याउने विश्वास व्यक्त गरे। “पुनरवलोकनको निस्सा पाउनुले यसअघिको फैसला र निर्वाचन आयोगको निर्णयमा खोट थियो भन्ने पुष्टि भएको छ,” खड्काले भने, “अदालतबाट अन्याय सच्याइनेछ र यसले गगन थापालाई पनि एकताको बाटोमा आउन प्रेरित गर्नेछ।” त्यस्तै, पूर्वउपसभापति विमलेन्द्र निधिले पनि फैसला पुनरवलोकनको आदेशबाट आफूहरू खुसी भएको र संविधान तथा विधान अनुसार न्याय पाइनेमा विश्वस्त रहेको बताए।अर्कोतर्फ, चीन भ्रमणमा रहेका कांग्रेस उपसभापति विश्वप्रकाश शर्माले सामाजिक सञ्जालमार्फत अदालतको पुनः परीक्षणले विशेष महाधिवेशनको वैधानिक तथ्य र राजनीतिक सत्यलाई थप प्रस्ट पार्ने प्रतिक्रिया दिएका छन्। उनले अदालतसमक्ष विशेष महाधिवेशनका सम्पूर्ण तथ्यहरू पुनः परिपक्वताका साथ प्रस्तुत गर्न आफूहरू पूर्ण रूपमा तयार रहेको बताएका छन्। राष्ट्रिय भेला नीति सम्मेलनमा बदलिने, देउवाले सम्बोधन गर्ने अदालतको नयाँ परिस्थिति पछि इतर समूहले साउन २९ देखि ३१ गतेसम्मका लागि तय गरेको राष्ट्रिय भेलालाई ‘नीति सम्मेलन’ को रूपमा सञ्चालन गर्ने भएको छ। नेता प्रकाशशरण महतका अनुसार भेलामा राजनीतिक, आर्थिक र विधान सम्बन्धी विषयमा गम्भीर छलफल हुनुका साथै निर्वाचनको समीक्षा गरिनेछ। पूर्वमहामन्त्री डा. शशांक कोइरालाको संयोजकत्वमा ३२ वटा उपसमिति गठन गरी तयारी अन्तिम चरणमा पुर्याइएको छ। हङकङमा रहेका पूर्वसभापति शेरबहादुर देउवा साउन २७ गते राति काठमाडौँ आइपुग्ने र २९ गतेको भेलालाई सम्बोधन गर्ने कार्यक्रम रहेको नेता महतले जानकारी दिए।
