साउन १५, सिरहा । गृहमन्त्री सुधन गुरुङ सिरहा पुगेर गोलबजारमा झडपका क्रममा ज्यान गुमाएका युवकको परिवारलाई भेट्दै छन् । गोलबजारमा झडपका क्रममा बिहीबार गोली लागेर ज्यान गुमाएका युवकको परिवारलाई भेट्न उनी सिरहा जान लागेका हुन् ।
गोलबजारमा बिहीबार सुरक्षाकर्मीको गोली लागेर औरही गाउँपालिका-२ तुलसीपुरका १७ वर्षीय गणेश यादवको ज्यान गएको थियो । गृहमन्त्री गुरुङ आज दिउँसो मृतकको घर पुगेर परिवारलाई भेट्ने कार्यक्रम छ ।
सिरहाका प्रहरी प्रमुख प्रहरी उपरीक्षक बासुदेव पाठकका अनुसार, गुरुङ अहिले बिराटनगरमै छन् । ‘मन्त्रीज्यू अहिले बिराटनगरमै हुनुहुन्छ, केही समयपछि त्यहाँबाट हिँड्नुहुन्छ,’ उनले भने, ‘दुई-तीन बजे आइपुग्नुहुन्छ होला ।’
झडपका क्रममा अर्का युवक धनुषाको धनुषाधाम नगरपालिका-८ धारापानी कुम्हराका १९ वर्षीय सुभाष ठाकुरलाई पनि गोली लागेको छ । उनको धरानमा उपचार भइरहेको छ ।
उता सप्तरीको सदरमुकाम राजविराज नगरपालिकाका विभिन्न क्षेत्रमा आज बिहान ५ः०० बजेदेखि अर्को आदेश नभएसम्मका लागि कर्फ्यु आदेश जारी भएको छ ।
जिल्ला प्रशासन कार्यालयले आज सूचना जारी गर्दै जिल्लामा शान्तिसुरक्षा कायम गर्न जिल्ला सुरक्षा समितिको निर्णयअनुसार कर्फ्यु आदेश जारी गरिएको जनाएको छ ।
प्रमुख जिल्ला अधिकारी श्यामकृष्ण थापाद्वारा जारी आदेशअनुसार राजविराज नगरपालिकाभित्र पूर्वमा खाँडो खोला, पश्चिममा हुलाकी राजमार्गको जुडनी–ढलही, उत्तरमा रूपनी रोडको बसबिट्टी चोक र दक्षिणमा कोशी पश्चिम मूल नहर (विष्णुपुर गाउँपालिका सीमा) सम्मको क्षेत्रमा कर्फ्यु आदेश जारी गरिएको छ ।
