सुनसरीको कप्तानगञ्जमा दुई जना युवाको ज्यान ज्यानेगरी भएको घटनामा पीडित पक्ष र सरकारबीच सम्झौता भएको छ।
प्रहरीको गोली लागेर मृत्यु भएका ओमप्रकाश मेहता र जयप्रकाश मेहताका अभिभावक र नेपाल सरकारको तर्फबाट गृहमन्त्री सुधन गुरुङबिच गएराति सम्झौता भएको हो।
सम्झौता पत्रमा गृहमन्त्री गुरुङ र ओमप्रकाशका अभिभावक कृष्णदेव र जयप्रकाशका अभिभावक नरेश मेहताले हस्ताक्षर गरेका छन्।
यही साउन १० गते सुनसरीको देवानगञ्ज गाउँपालिका–३ कप्तानगञ्जमा प्रहरीको गोली लागेर ओम प्रकाश मेहता र जय प्रकाश मेहताको मृत्यु भएको थियो।
पीडित पक्षसँग सम्झौता गर्नुअघि गृहमन्त्री गुरुङ मृतकद्वयकाे घरमै पुगेका थिए। उनले घाइतेहरूलाई पनि अस्पतालमै पुगेर भेटेका छन्।
सरकार र पीडित पक्षबिच भएको सम्झौता अनुसार नेपाल सरकारले मृतकद्वयलाई शहीद घोषणा गर्ने प्रक्रिया तत्काल अगाडि बढाउनेछ भने मृतकका परिवारलाई जनही १० लाख रुपैयाँ राहत रकम उपलब्ध गराउनेछ।
घटनाको निष्पक्ष तथा प्रभावकारी छानबिन गरी दोषीमाथि कानून बमोजिम कडा कारबाही प्रक्रिया अघि बढाउने सहमति पनि सम्झौतामा छ।
