मर्मिरे अनलाइन, बुटवल । नेकपा (एमाले) र नेपाली कम्युनिष्ट पार्टी (नेकपा) बीच देशका सातै प्रदेशमा सत्ता सहकार्य गर्ने सहमति भएसँगै लुम्बिनी प्रदेश सरकारमा सहभागी नेपाली कांग्रेसका मन्त्रीहरूले सामूहिक राजीनामा दिने भएका छन्।
कांग्रेस केन्द्रीय समितिले अघिल्लो महिना नै एमालेसँगको सत्ता सहकार्य अन्त्यको निर्णय गरिसकेको भए पनि लुम्बिनीका मन्त्रीहरू सरकारमै थिए। तर, शनिबार एमाले र नेकपाबीच औपचारिक सहमति बनेपछि एमाले नेतृत्वको सरकारमा बसिरहन नैतिक सङ्कट परेकाले कांग्रेसका मन्त्रीहरू बाहिरिन लागेका हुन्।
उद्योग, पर्यटन तथा यातायात मन्त्री प्रचण्डविक्रम न्यौपानेका अनुसार मन्त्रीहरू भेला भएर सम्भव भएसम्म आजै मुख्यमन्त्री चेतनारायण आचार्यसमक्ष राजीनामा बुझाउने तयारी छ।
यी हुन् राजीनामा दिने कांग्रेसका ५ मन्त्री:
सरोज थापा – शहरी विकास तथा खानेपानी
धनेन्द्र कार्की – आर्थिक मामिला
प्रचण्डविक्रम न्यौपाने – उद्योग, पर्यटन तथा यातायात
जन्मजय तिमिल्सेना – सामाजिक विकास
देवकरण कलवार – वन तथा वातावरण
अंकगणित: एमाले-नेकपा गठबन्धनलाई स्पष्ट बहुमत
८७ सदस्यीय लुम्बिनी प्रदेशसभामा हाल ८३ जना सांसद कायम छन्। प्रदेशमा नयाँ सरकार बनाउन वा बहुमत सिद्ध गर्न ४२ सांसदको समर्थन आवश्यक पर्छ।
एमाले: २९
नेकपा: १३ (सभामुखसहित)
जम्मा: ४२ सांसद
एमाले र नेकपा मिल्दा मात्रै बहुमत (४२ सीट) पुग्ने देखिन्छ। यसबाहेक पूर्व माओवादी पृष्ठभूमिका एक स्वतन्त्र सांसद (खड्गबहादुर बस्नेत) ले पनि नयाँ गठबन्धनलाई नै सघाउने दुवै दलको विश्वास छ।
विवाद र सहकार्य भङ्गको पृष्ठभूमि
२०८१ साउन ७ गते एमालेका चेतनारायण आचार्यको नेतृत्वमा कांग्रेस-एमाले गठबन्धन सरकार बनेको थियो। सम्झौता अनुसार २०८१ चैतसम्म एमालेले र त्यसपछि बाँकी कार्यकाल कांग्रेसले सरकारको नेतृत्व गर्ने सहमति थियो। तर, सत्ता हस्तान्तरण र बजेट निर्माणका क्रममा विवाद बढेपछि कांग्रेसले गत असार ३१ गते एमालेसँगको सहकार्य तोड्ने निर्णय गरेको थियो।
