पश्चिम नवलपरासी , ८ जेठ । सशस्त्र प्रहरी बल,नेपाल नं. २६ गण हे.क्वा. पश्चिम नवलपरासीले ठुलो परिमाणमा अवैध रूपमा लुकाईछिपाई राखिएको खरबुजाको बियाँ बरामद गरेको छ । विशेष सूचनाको आधारमा खटिएको सशस्त्र प्रहरीको संयुक्त टोलीले बिहीबार बिहान अन्दाजी ७:०० बजेको समयमा जिल्लाको प्रतापपुर गाउँपालिका वडा नं. ५ मटरा स्थित बाबुराम पालको खाली टहराबाट उक्त अवैध सामान बरामद गरेको हो ।
टहरामा गैरकानुनी रूपमा सामान भण्डारण गरिएको खबर पाएलगत्तै सशस्त्र प्रहरी बल,नेपाल नं. २६ गण हे.क्वा. पश्चिम नवलपरासीबाट सशस्त्र प्रहरी नायब उपरीक्षक सूर्य प्रकाश शर्मा र सशस्त्र प्रहरी बल,नेपाल वि.ओ.पि. गुठिप्रसौनीबाट सशस्त्र प्रहरी निरीक्षक बद्रीनाथ देवकोटाको कमाण्डमा संयुक्त टोली परिचालन गरिएको थियो ।
प्रहरी टोलीले उक्त स्थानमा खानतलासी गर्दा लुकाएर राखिएको कुल ४ हजार ७ सय २० केजी (११८ बोरा) खरबुजाको बियाँ (Watermelon seeds) फेला पारेको हो,जसको अनुमानित बजार मूल्य १४ लाख १६ हजार रुपैयाँ बराबर रहेको छ । बरामद गरिएको उक्त अवैध सामानलाई आवश्यक कानुनी कारबाहीका लागि महेशपुर भन्सार कार्यालयमा बुझाइएको सशस्त्र प्रहरीले जनाएको छ ।
