काठमाडौँ, बैशाख २२ : । कालङ्गा हाइड्रो लिमिटेडले आगामी जेठ ८ गतेदेखि आम सर्वसाधारणका लागि प्राथमिक सेयर (आईपीओ) निष्कासन गर्ने भएको छ। कम्पनीले २८ लाख ७० हजार कित्ता साधारण सेयरको बिक्री खुलाउन लागेको हो।
यसअघि कम्पनीले पहिलो चरणअन्तर्गत आयोजना प्रभावित स्थानीय बासिन्दा तथा वैदेशिक रोजगारीमा रहेका नेपालीका लागि आईपीओ जारी गरिसकेको छ। अहिले दोस्रो चरणमा सर्वसाधारणका लागि सेयर खुला गर्न लागिएको हो।
सर्वसाधारणले यस आईपीओमा न्यूनतम १० कित्तादेखि अधिकतम २० हजार कित्तासम्मका लागि आवेदन दिन सक्नेछन्। आईपीओ छिटोमा जेठ १३ गते र ढिलोमा जेठ २२ गते बन्द हुनेछ।
कम्पनीलाई ‘केयर रेटिङ नेपाल’ ले ‘केयर एनपी डबल बी इस्योर’ रेटिङ प्रदान गरेको छ। उक्त रेटिङले समयमै वित्तीय दायित्व चुक्ता गर्ने विषयमा मध्यम जोखिम रहेको जनाउँछ।
लगानीकर्ताले नेपाल धितोपत्र बोर्डबाट स्वीकृति प्राप्त आस्वा सदस्य बैंक तथा वित्तीय संस्था र तिनका तोकिएका शाखा कार्यालयहरूमार्फत आवेदन दिन सक्नेछन्। साथै, ‘मेरो सेयर’ प्रणालीमार्फत अनलाइन आवेदन पनि गर्न सकिनेछ।
कम्पनीको आईपीओ निष्कासन तथा बिक्री प्रबन्धकको रूपमा सानिमा क्यापिटल लिमिटेड रहेको छ।
