काठमाडौं । नेपाल टेलिकमले देशका विकट तथा दुर्गम क्षेत्रहरूमा सञ्चार पहुँच पुर्याउने उद्देश्यले स्याटेलाइट प्रविधिमार्फत सेवा विस्तारलाई तीव्र पारेको छ। कम्पनीले भौगोलिक रूपले कठिन र कम जनसङ्ख्या भएका स्थानहरूमा VSAT (भी-सय्याट) प्रविधि प्रयोग गरी २जी (2G) मोबाइल, टेलिफोन र डाटा सेवा उपलब्ध गराइरहेको छ।
चार नयाँ पर्यटकीय र दुर्गम क्षेत्रमा सेवा विस्तार
चालु आर्थिक वर्षमा मात्रै टेलिकमले चारवटा नयाँ स्थानमा स्याटेलाइटमा आधारित GSM मोबाइल सेवा सुरु गरेको छ। जसमा डोल्पाको माथिल्लो क्षेत्रमा रहेका कान्छो गाउँ, कुगाउँ र निजाल, दोलखाको प्रसिद्ध च्छो-रोल्पा पदमार्गमा पर्ने ना-गाउँ र रसुवाको गोसाइँकुण्ड पदमार्गमा पर्ने चन्दनबारी रहेका छन्।
डोल्पामा सबैभन्दा धेरै पहुँच
हाल नेपाल टेलिकमले देशका विभिन्न ३८ दुर्गम स्थानमा यो प्रविधिबाट सेवा दिइरहेको छ। यसमध्ये सबैभन्दा बढी १४ वटा साइट डोल्पा जिल्लामा मात्र रहेका छन्। डोल्पाका छार्का-ताङसोङ, धो, फोक्सुण्डो, साल्दाङ, भिजेर जस्ता अति विकट बस्तीहरूमा अहिले मोबाइल सेवा पुगेको छ।
यसैगरी, हुम्लाका ५, मुगुका ५, मनाङका ३, सोलुखुम्बुका २, ताप्लेजुङका २ र दार्चुलाको टिङ्कर लगायतका क्षेत्रमा पनि यो सेवा सञ्चालनमा छ।
व्यावसायिक लाभभन्दा सेवालाई प्राथमिकता
सडक सञ्जाल नपुगेका यी क्षेत्रहरूमा उपकरण पुर्याउन टेलिकमले हेलिकप्टरको समेत प्रयोग गर्दै आएको छ। यी स्थानहरूमा गरिने लगानीबाट व्यावसायिक नाफा नहुने भए तापनि ‘नेपाल टेलिकम राष्ट्रको सञ्चार’ भन्ने मूल नारालाई सार्थक तुल्याउन सञ्चार सुविधा पुर्याइएको कम्पनीले जनाएको छ।
अप्टिकल फाइबर र ब्याकवोन सुदृढीकरण
नेपाल टेलिकमले दुर्गममा मात्र नभई देशभरको नेटवर्कलाई मजबुत बनाउन अप्टिकल फाइबर विस्तारको कामलाई पनि तीव्रता दिएको छ। ब्याकवोन प्रसारण निर्देशनालयअन्तर्गत पूर्व-पश्चिम र उत्तर-दक्षिण करिडोरहरूमा उच्च क्षमताको डाटा ट्रान्समिसन सुनिश्चित गर्न काम भइरहेको छ।
नेटवर्कलाई भरपर्दो बनाउन पुराना स्वीच उपकरणहरूलाई आधुनिक राउटरमा स्तरोन्नति गर्ने, लिंकहरूको क्षमता बढाउने र वैकल्पिक (Redundant) लिंकहरूको स्थापना गर्ने कार्य भइरहेको छ। यसले गर्दा एउटा लिंकमा समस्या आउँदा पनि अर्को मार्गबाट सेवा सुचारु राख्न मद्दत पुग्नेछ।
टेलिकमले आगामी दिनमा स्याटेलाइटमा आधारित यी साइटहरूलाई अन्य आधुनिक प्रविधिमार्फत स्तरोन्नति गर्ने लक्ष्य राखेको छ। साथै, नेपाली सेना र सडक विभागसँगको समन्वयमा विभिन्न सडक खण्डहरूमा अन्डरग्राउन्ड अप्टिकल फाइबर बिछ्याउने कार्य पनि चरणवद्ध रूपमा अगाडि बढिरहेको छ।
