बैशाख १७ । सोपान फर्मास्यूटिकल्स लिमिटेडको प्रारम्भिक सार्वजनिक निष्काशन (आईपीओ) को बाँडफाँट बैशाख १७ गते बिहीबार सम्पन्न भएको छ। कम्पनीको शेयर निष्काशन तथा बिक्री प्रबन्धक एनएमबी क्यापिटल लिमिटेडको कार्यालयमा उक्त बाँडफाँट कार्य सम्पन्न भएको हो।
कम्पनीले बैशाख ३ गतेदेखि ८ गतेसम्म प्रति कित्ता १०० रुपैयाँ अंकित मूल्यका ३४ लाख ७४ हजार ९०० कित्ता साधारण शेयर (कुल ३४ करोड ७४ लाख ९० हजार रुपैयाँ बराबर) सर्वसाधारणका लागि निष्काशन गरेको थियो।
उक्त निष्काशनमा २७ लाख ३० हजार ९८७ जना आवेदकहरूबाट २ करोड ९९ लाख ६ हजार ५२० कित्ता शेयरको लागि आवेदन परेको थियो, जुन कुल निष्काशन भन्दा अत्यधिक माग हो।
मागभन्दा बढी आवेदन परेकोले गोला प्रथा (लटरी) मार्फत बाँडफाँट गरिएको हो। बाँडफाँट परिणामअनुसार ३ लाख ४७ हजार ४९० जना आवेदकहरूले १०/१० कित्ताका दरले शेयर प्राप्त गरेका छन्।
