काठमाडौँ । सरकारले १० किलोग्रामभन्दा कम तौलका प्याकमा बेकरी सर्टेनीङ्ग (Bakery Shortening) को उत्पादन, प्याकेजिङ तथा बिक्री वितरण गर्न रोक लगाएको छ । खाद्य प्रविधि तथा गुण नियन्त्रण विभागले एक जरुरी सूचना जारी गर्दै यस्तो प्रतिबन्ध लगाएको हो ।
विभागको मिति २०८३/०१/१४ गतेको निर्णयानुसार अबदेखि कुनै पनि उद्योगले १० केजीभन्दा कम तौल भएको प्याकेटमा बेकरी सर्टेनीङ्ग उत्पादन वा बिक्री गर्न पाउने छैनन् ।
१५ दिनभित्र ‘रिकल’ गर्नुपर्ने
सूचनामा हाल बजारमा बिक्री वितरणमा रहेका १० केजीभन्दा कम तौलका बेकरी सर्टेनीङ्गका प्याकहरूलाई सूचना प्रकाशित भएको मितिले १५ दिनभित्र अनिवार्य रूपमा बजारबाट फिर्ता गर्न निर्देशन दिइएको छ । बजारबाट फिर्ता गरिएका सामानहरूको जानकारी सम्बन्धित उद्योग रहेको क्षेत्रको विभाग वा मातहतका कार्यालयमा गराउन समेत भनिएको छ ।
विभागले यो निर्देशनको उल्लंघन गरी कसैले उत्पादन, प्याकेजिङ वा बिक्री वितरण गरेको पाइएमा खाद्य स्वच्छता तथा गुणस्तर ऐन, २०८१ बमोजिम कडा कारबाही गरिने चेतावनी दिएको छ ।
आम उपभोक्ताको स्वास्थ्य र खाद्य सुरक्षालाई ध्यानमा राख्दै विभागले यो कदम चालेको बुझिएको छ । थप जानकारीका लागि विभागले आफ्नो वेबसाइट www.dftqc.gov.np वा फोन नं. ०१-५३६२३६९ मा सम्पर्क गर्न समेत अनुरोध गरेको छ ।
