बैशाख ११, २०८३ । बैशाख ११ गते शुक्रबार, अपोलो हाइड्रोपावर लिमिटेडको आईपीओ बाँडफाँट सम्पन्न भएको छ। कम्पनीको शेयर निष्कासन तथा बिक्री प्रबन्धक हिमालयन क्यापिटल लिमिटेडको कार्यालयमा उक्त बाँडफाँट गरिएको हो।
कम्पनीले ६ मेगावाट क्षमताको बुखु जलविद्युत् आयोजना प्रवर्द्धन गरिरहेको छ भने सञ्चित कोषमा उच्च जोखिम रहेको सङ्केत गर्दै केयर रेटिङ नेपालले यसलाई ‘केयर-एनपी डबल बी (आइएस)’ रेटिङ प्रदान गरेको छ।
कम्पनीले गत चैत २६, २०८२ देखि वैशाख २, २०८३ सम्म सर्वसाधारणका लागि आईपीओ निष्कासन गरेको थियो। कम्पनीले ५७ करोड रुपैयाँ जारी पुँजीको ३० प्रतिशत अर्थात् १४ लाख १० हजार कित्ता साधारण शेयर सर्वसाधारणमा ल्याएको थियो। पहिलो चरणमा स्थानीय, वैदेशिक रोजगारीमा रहेका नेपाली, सामूहिक लगानी कोष तथा कर्मचारीलाई बिक्री गरिसकेपछि दोस्रो चरणमा सर्वसाधारणका लागि ७ लाख ८० हजार २०० कित्ता शेयर निष्काशन गरिएको थियो।
उक्त निष्कासनमा २८ लाख ७६ हजार १०२ जना आवेदकले कुल ३ करोड २७ लाख ४० हजार ३३० कित्ता शेयरका लागि आवेदन दिएका थिए। जसअनुसार यो आईपीओ झण्डै ४१.९६ गुणा बढीले धेरै आवेदन परेको थियो।
मागभन्दा धेरै आवेदन परेको हुँदा गोला प्रक्रियाबाट बाँडफाँट गरिएको छ। सोही प्रक्रियाअनुसार ७८ हजार २० जना आवेदकले १०/१० कित्ताका दरले शेयर प्राप्त गरेका छन्। बाँकी सबै आवेदकको भने हात खाली भएको छ।
यससँगै अपोलो हाइड्रोपावरको सेयर अब नेप्सेमा दोस्रो बजारमा सूचीकरणको प्रक्रियामा रहने छ।
