काठमाडौँ । नेपालको अग्रणी जीवन बीमा कम्पनी नेपाल लाइफ इन्स्योरेन्स कम्पनी लिमिटेडले आफ्नो स्थापनाको २५औँ वर्ष (रजत जयन्ती) प्रवेश गरेको सुखद अवसरमा बीमितहरूका लागि विशेष राहत प्याकेज घोषणा गरेको छ। कम्पनीले ‘विशेष बीमा पुनर्जागरण योजना २०८२/०८३’ अन्तर्गत व्यतीत भएका बीमालेखहरू पुनः सक्रिय गराउँदा लाग्ने विलम्ब शुल्क (जरिवाना) मा १०० प्रतिशतसम्म छुट दिने भएको हो।
विगत केही समययताको सुस्त आर्थिक गतिविधिका कारण समयमै बीमाशुल्क बुझाउन नसकी बीमालेख व्यतीत भएका ग्राहकहरूलाई लक्षित गर्दै कम्पनीले यो योजना ल्याएको हो। यो योजना आगामी २०८३ वैशाख ७ गतेदेखि जेठ ५ गतेसम्म (एक महिना) लागू रहनेछ।
योजनाका मुख्य आकर्षणहरू:
जरिवानामा पूर्ण छुट: तोकिएको अवधिभित्र बीमालेख नवीकरण गर्दा विलम्ब शुल्कमा १०० प्रतिशतसम्म छुट पाइने।
सीमित अवधि: यो अफर २०८३ वैशाख ७ देखि जेठ ५ गतेसम्म मात्र उपलब्ध हुने।
आर्थिक सुरक्षाको ग्यारेन्टी: व्यतीत बीमालेख पुनः सक्रिय हुनासाथ बीमितले पुनः पूर्ण बीमा सुरक्षा र जोखिम वहनको सुविधा पाउने।
यस विशेष योजनाका बारेमा बोल्दै कम्पनीका प्रमुख कार्यकारी अधिकृत (CEO) प्रवीण रमण पराजुलीले भन्नुभयो, “हामी हाम्रा ग्राहकहरूको हितलाई सधैं केन्द्रमा राख्छौँ। विभिन्न परिस्थितिले गर्दा बीमाशुल्क तिर्न ढिलाइ भएका बीमितहरूलाई पुनः सुरक्षाको घेराभित्र ल्याउन र उनीहरूको भविष्य सुरक्षित गर्न यो ठूलो छुटको व्यवस्था गरिएको हो। यो अवसरको सदुपयोग गर्न हामी सम्पूर्ण बीमितहरूलाई आग्रह गर्दछौँ।”
नेपाल लाइफ इन्स्योरेन्सले हाल नेपालको जीवन बीमा बजारको करिब ३० प्रतिशत हिस्सा ओगटेको छ। देशभरका ७७ वटै जिल्लामा फैलिएको शाखा सञ्जाल र करिब ६९,००० अभिकर्ताहरूमार्फत कम्पनीले गुणस्तरीय सेवा प्रदान गर्दै आएको छ।
बीमालेख व्यतीत भएका ग्राहकहरूले आफ्नो नजिकैको शाखा कार्यालय वा आधिकारिक अभिकर्तासँग सम्पर्क गरी यो सुनौलो अवसरको लाभ लिन सक्ने कम्पनीले जनाएको छ।
