काठमाडौँ । नेपाल स्टक एक्सचेन्ज (नेप्से) ले शेयर कारोबारको समय तालिकामा परिवर्तन गर्दै अबदेखि शुक्रबार पनि बजार सञ्चालन गर्ने निर्णय गरेको छ । सरकारले पेट्रोलियम पदार्थको खपत कम गर्ने उद्देश्यले आइतबार सार्वजनिक बिदा दिने निर्णय गरेसँगै नेप्सेले शुक्रबार बजार खुला गर्ने नीति लिएको हो ।
हिजो बसेको नेप्से सञ्चालक समितिको बैठकले साताको पाँच दिन कारोबार सुनिश्चित गर्नका लागि शुक्रबार बजार खोल्ने निर्णय गरेको हो । नयाँ व्यवस्था अनुसार अबदेखि साताको दुई दिन शनिबार र आइतबार बजार बन्द रहनेछ भने सोमबारदेखि शुक्रबारसम्म नियमित कारोबार सञ्चालन गरिनेछ ।
नेप्सेका प्रमुख कार्यकारी अधिकृत चूडामणि चापागाईँका अनुसार शुक्रबार कार्यालय समय साँझ ५ बजेसम्म कायम रहने र सोही दिन शेयर कारोबार समेत हुनेछ । मन्त्रिपरिषद्को हालैको बैठकले बढ्दो इन्धन खपत र वैदेशिक मुद्रा सञ्चितिमा परेको चापलाई मध्यनजर गर्दै आइतबार सरकारी कार्यालयहरूमा बिदा दिने निर्णय गरेको थियो । सोही निर्णयलाई पछ्याउँदै नेप्सेले लगानीकर्ताहरूको हित र बजारको सक्रियताका लागि शुक्रबार बजार चलाउने प्रक्रिया अगाडि बढाएको जनाएको छ ।
नेप्सेले शुक्रबार कारोबार खोल्न लागेको यो पहिलो पटक भने होइन । यसअघि २०७९ सालमा पनि सरकारले शनिबार र आइतबार दुई दिन सार्वजनिक बिदा दिने निर्णय गर्दा नेप्सेले शुक्रबार कारोबार सञ्चालन गरेको थियो । पछि सरकारले आइतबारको बिदा खारेज गरेपछि नेप्से पुनः पुरानै कार्य तालिकामा फर्किएको थियो ।
विगतमा पनि शुक्रबार बजार चलाएको अनुभव भएकाले यस पटक नयाँ व्यवस्था कार्यान्वयन गर्न कुनै प्राविधिक समस्या नहुने सञ्चालकहरूले बताएका छन् ।
