नुवाकोट, फागुन १० ।
आगामी फागुन २१ गते हुने प्रतिनिधिसभा सदस्य निर्वाचनका लागि नुवाकोट क्षेत्र नम्बर १ मा चुनावी सरगर्मी ह्वात्तै बढेको छ। यसै क्रममा नेपाली कम्युनिस्ट पार्टीका साझा उम्मेदवार हितबहादुर तामाङले आइतबार सूर्यगढी गाउँपालिकाका विभिन्न वडा र बस्तीहरूमा सघन घरदैलो तथा जनभेटघाट कार्यक्रम सम्पन्न गर्नुभएको छ।
बिहानैदेखि रातको अबेरसम्म घरदैलो
उम्मेदवार तामाङ बिहानै ८:०० बजे फेदिबेसी, पिप्ले र माछापोखरी क्षेत्रबाट घरदैलो सुरु गर्दै मतदाताको आँगनमा पुग्नुभएको थियो। उहाँले बिहान ९:०० बजे डि गाउँ र ९:४५ मा कालिमाटीका स्थानीयहरूसँग भेटघाट गरी उनीहरूका समस्या र अपेक्षाबारे जानकारी लिनुभयो।
दिनभरिको कार्यतालिका अनुसार उम्मेदवार तामाङको टोलीले केराबारी, स्वाँरा, चिसापानी, बेसारे, कामथुम, हल्दे, सिम्ले र अर्चले लगायतका क्षेत्रमा पुगेर चुनावी सभा तथा व्यक्तिगत भेटघाटलाई तीव्रता दिएको थियो।
सहिद परिवारसँग भावुक भेट
अपरान्ह ४:३० बजे रातमाटेस्थित गणेश मा.वि. एरियामा पुग्नुभएका तामाङले त्यहाँका सहिद परिवारहरूसँग विशेष भेटघाट गर्नुभयो। सो अवसरमा उहाँले भन्नुभयो, “सहिदहरूको सपना र उहाँहरूको परिवारको त्यागलाई हामी खेर जान दिने छैनौँ। यो लडाइँ व्यवस्था परिवर्तनसँगै अवस्था परिवर्तनका लागि हो।”
साँझमा पनि उत्साहजनक जनलहर
साँझ ५:०० बजेपछि अचाने, बेलडाँडा, ढाँडे र खारे क्षेत्रमा पुग्दा स्थानीयले तामाङलाई भव्य स्वागत गरेका थिए। रातको ७:३० बजे देवकोटा टोल र डाँडागाउँमा पुगेर आइतबारको चुनावी अभियान समापन भएको थियो।
के भन्छन् उम्मेदवार तामाङ?
घरदैलोका क्रममा संक्षिप्त प्रतिक्रिया दिँदै उम्मेदवार तामाङले भन्नुभयो:
”नुवाकोटको विकास र समृद्धिको बाँकी काम पूरा गर्न मेरो उम्मेदवारी हो। सूर्यगढीका जनताको यो अभूतपूर्व माया र समर्थनले मेरो जित सुनिश्चित भइसकेको छ। म विकास र सुशासनको सारथि बनेर सधैँ तपाईँहरूकै सेवामा रहनेछु।”
घरदैलो कार्यक्रममा नेकपाका स्थानीय नेता, कार्यकर्ता र शुभेच्छुकहरूको ठुलो संख्यामा उपस्थिति रहेको थियो। मतदाताहरूले पनि तामाङलाई विकासप्रेमी नेताको रूपमा चित्रण गर्दै यसपटक पनि विजयी गराउने प्रतिबद्धता जनाएका छन्।
