४ पुस, काठमाडाैं । राष्ट्रिय स्वतन्त्र पार्टीका सभापति रबि लामिछाने शुक्रबार साँझ जेलबाट छुटेका छन् ।
उच्च अदालत तुल्सीपुर दाङकाे बुटवल इजलासबाट बिहीबार भएकाे आदेशले २ कराेड ७४ लाख ८४ हजार रूपैयाँ धराैटी बुझाएर थुनामुक्त भएका हुन् । ललितपुर नख्खु जृलमा रहेका उनलाई आजै हवाइजाहजबाट चितवन र त्यहाँबाट गाडीमा राखेर रूपन्देहीकाे भैरहावास्थित जिल्ला अदालत पुर्याइएकाे थियाे । त्यहाँ उच्चकाे आदेशबमाेजिम कागज गराई अदालत प्रशासनले थुनामुक्त गरेका थिए ।
छुटेपछि उनले अदालत परिसरमा संचारकर्मीकाे प्रश्नमा आफूलाई राजनीति प्रतिशाेधमा थुनामा राखिएकाे र न्याय पाउन अझै बाँकी रहेकाे प्रतिक्रया दिए । उनले भने, ‘न्यायको लडाइँ मैले अझ धेरै लड्नुछ, अहिले धेरै बाेल्दिनँ ।’ अब बाेल्ने दिन जनताकाे आएकाे बताए ।
सरकार र सत्तामा बस्नेहरूले देशमाथि चरम अन्याय गरिरहेका तुलनामा आफूमाथिकाे अन्याय ठूलाे कुरा नभएकाे बताए । बाँकी समय पूरै तागतसाथ देश र जनताका न्यायका लागि लगाउने उनकाे भनाई छ । उनले अदालतप्रति कृतज्ञता प्रकट गरे ।
उनलाई प्रहरीले भैरहवाबाट स्कर्टिङ गरेर राति नै चितवन पुर्याउँदैछ । भाेलि शनिबार चितवनमा पार्टीले आयाेजना गर्ने कार्यक्रमलाई सम्बाेधन गर्ने भएकाे छ ।
