काठमाडौंबाट गोरखा जाँदै गरेको ट्याक्सी आज बिहान ७ बजे चितवनको मुग्लिन पुग्न लाग्दा त्रिशूली नदीमा खसेर दुर्घटना हुँदा एकै परिवारका पाँच जनाको ज्यान गयो ।
बा २ ज ४१९६ नम्बरको ट्याक्सी चितवनको इच्छाकामना गाउँपालिका–५ सिमलधारास्थित पृथ्वी राजमार्ग सडकबाट करिब ५० मिटर तल त्रिशूली नदीमा खस्दा उनीहरुको ज्यान गयो । उनीहरु पशुपति आर्यघाटमा आफन्तको दाहासंस्कार गरेर फर्कदै थिए ।
ट्याक्सीमा गोरखा नगरपालिका–७ का ३५ वर्षीय अर्जुन शिर्मल, ७० वर्षीया जुनमाया रोकाया, २८ वर्षीया अन्जना रोकाया, १८ वर्षीय दिवस रोकाया, वडा नम्बर ७ फिनामका ४१ वर्षीया हरिमाया रोकाया र ९ वर्षीय आगमन नगरकोटी र सवार थिए। दिवस बाहेक सबैलाई मृत अवस्थामा निकालिएको थियो ।
जिल्ला प्रहरी कार्यालय चितवनका सूचना अधिकारी डिएसपी श्रीराम भण्डारीका अनुसार मृतकहरू एउटै परिवारका हुन्।
गोरखा नगरपालिका–७ का ३९ वर्षीय शंकर रोकायाको शुक्रबार उपचारका क्रममा काठमाडौंमा निधन भएको थियो। उनी त्रिशूलीमा बेपत्ता भएका १८ वर्षीय दिवसका बाबु हुन्।
गोरखा नगरपालिका–७ का वडाध्यक्ष विष्णुप्रसाद श्रेष्ठका अनुसार शंकरको निधनपछि पशुपति आर्यघाटमा अन्तिम संस्कार गरी उनका आफन्त घर फर्कंदै थिए। दुर्घटनामा परी मृत्यु भएका ७० वर्षीय जुनमाया रोकाया शंकरकी आमा हुन्।
छोराको निधन भएपछि काठमाडौं पुगेकी थिइन्। हरिमाया र अन्जना उनकी छोरी हुन्। ९ वर्षका आगमन हरिमायाका छोरा हुन्। वडाध्यक्ष श्रेष्ठका अनुसार ट्याक्सी चालक जुनमायाका ज्वाइँ हुन् ।
शुक्रबार शंकरको दाहसंस्कारका लागि परिवारका अन्य सदस्य र आफन्तहरू पनि काठमाडौं पुगेका थिए।
