कन्चनपुर , १ असार । कोरोना भाइरस संक्रमणको महामारी रोक्न सरकारले गरेको लकडाउनका कारण व्यवसाय थलिएका बेला किसानमाथि अर्को संकट आएको छ । कञ्चनपुरका किसानको खेतबारीमा अमेरिकन फौजी किराको आतंक सुरू भएको छ ।
मकै लगायतका नगदेबालीमा सिजनकै बेला फौजी किराको आतंक देखिएपछि किसानले क्षति व्यहोर्नुपर्ने अनुमान कृषि क्षेत्रका जानकारले गरेका छन् ।
सन् २०१५ मा पहिलोपटक अमेरिकामा देखिएको फौजी किरा हाल नेपाल प्रवेश गरिसकेको कृषि ज्ञान केन्द्र कञ्चनपुरले जनाएको छ । २०७६ साउन २७ गते बसेको राष्ट्रिय बिरूवा संरक्षण संगठनको १९ औं बैठकले देशका विभिन्न स्थानहबाट संकलित नमूनाको डीएनए परीक्षणबाट नेपालमा फौजी किरा प्रवेश गरेको पुष्टि भएको थियो ।
कृषि ज्ञान केन्द्र कञ्चनपुरका प्रमुख रामचन्द्र भट्ट्ले फौजी किराले अण्डा पार्नुभन्दा पहिले ५०० किलोमिटर टाढासम्म उडेर जानसक्ने भएकाले धेरै क्षेत्रमा फैलिएको बताए । ज्ञान केन्द्र कञ्चनपुरका प्राविधिक जनक सिंहले अमेरिकन फौजी किराले सबैभन्दा बढी मकै लगायत ३५३ बालीनाली र बोटबिरूवामा नोक्सानी पुर्याउन सक्ने बताए ।
प्रमुख भट्टका अनुसार फौजी किराविरुद्ध किसानले जथाभाबी विषादीको प्रयोग गर्दा कृषिमा असर पर्ने भएकाले प्राविधिकको परामर्शमा प्रयोग गर्नु राम्रो हुन्छ । कृषिमा असर पुग्ने बताएका छन् ।
कृषि ज्ञान केन्द्र कञ्चनपुरद्वारा अमेरिकन फौजी किरा व्यवस्थापन गर्न जिल्ला स्तरीय सरोकारवालासगँ छलफल गरेको छ ।
