काठमाडौं, फागुन २८ । जिम्बाब्वेमा जारी आइसीसी विश्वकप छनोट क्रिकेट प्रतियोगिताको समूह चरणको अन्तिम खेलमा नेपालले हङकङलाई ५ विकेटले हराएको छ । सोमबार भएको खेलमा नेपालले १५४ रनको सामान्य चुनौती ४० ओभर ४ बलमै ५ विकेटको क्षतिमा पूरा गरेको हो ।
छैटौं विकेटका लागि रोहितकुमार पौडेल र सोमपाल कामीबीच अविजित ८९ रनको साझेदारी भएपछि नेपालले सहज विजय हासिल गरेको हो । रोहितले ८६ बलमा ४८ तथा सोमपालले ४० बलमा ३७ रन जोडे ।
पहिलो विकेटका लागि ४१ रनको साझेदारी गर्नेक्रममा अनिलकुमार शाहले २६ र ज्ञानेन्द्र मल्लले १२ रन बनाएका थिए । यस्तै, दीपेन्द्रसिंह ऐरीले १२ र कप्तान पारस खड्काले ११ रनको योगदान गरे ।
यसअघि, टस जितेर पहिले ब्याटिङ गरेको हङकङले ४८ ओभर २ बलमा अलआउट हुँदै १५३ रन बनाएको थियो ।
नेपालका लागि सन्दीप लामिछानेले ३ विकेट लिए । बसन्त रेग्मी र करण केसीले समान २/२ तथा सोमपाल कामी र ललित राजवंशीले १/१ विकेट लिए ।
यो जितबाट पनि नेपालले विश्वकप छनोटको ‘सुपर सिक्स’मा भने ठाउँ बनाउन सकेन ।
समान २/२ अंक भएपनि अफगानिस्तान राम्रो रनरेटका आधारमा सुपर सिक्समा पुग्यो । त्यस्तै, हङकङ समूह ‘बी’को पुछारमा रह्यो ।
नेपालले यसअघि सुरुआती तीन खेलमा जिम्बाब्वे, स्कटल्यान्ड र अफगानिस्तानसँग पराजय व्यहोरेको थियो ।
