काठमाडौं, फागुन २० ।
पहिलोपटक ५० ओभर क्रिकेटको विश्वकप खेल्ने र आगामी चार वर्षका लागि एकदिवसीय टोलीको मान्यता जित्ने सपना बुनेको नेपाली राष्ट्रिय क्रिकेट टोलीले त्यसको पहिलो परीक्षास्वरूप आइतबार (आज) आयोजक जिम्बाब्वेविरुद्ध खेल्दैछ। यी दुवै उद्देश्य प्राप्तिका लागि नेपाली टोलीलाई पहिलो परीक्षामै खरो उत्रनुपर्ने बाध्यता छ।
नेपाली समयअनुसार दिउँसो सवा १ बजे खेल सुरु हुने छ ।
प्रतियोगितामा टेष्ट मान्यता प्राप्त चार राष्ट्रसहित कूल १० राष्ट्रले प्रतिस्पर्धा गर्दै छन् । नेपाल र जिम्बावेसँगै समुह बी मा अफगानिस्तान, स्कटल्याण्ड र हङकङ रहेका छन् ।
यस्तै समूह ए मा वेष्ट इन्डिज, आयरल्याण्ड, नेदरल्याण्ड्स, युएई र पपुवान्युगिनी छन् ।
प्रतियोगिताका शीर्ष दुई स्थानमा रहने राष्ट्र अर्को बर्ष इङ्ल्यान्डमा आयोजना हुने एक दिवसीय विश्वकप क्रिकेट प्रतियोगिताका लागि छनोट हुने छन् ।
विश्व क्रिकेट लिग डिभिजन २ बाट बढुवा हुँदै प्रतियोगितामा स्थान बनाएको नेपालले सुपरसिक्स चरणमा पुग्दै एक दिवसीय अन्तराष्ट्रिय मान्यता पाउने प्रमुख लक्ष्य बनाएको छ ।
नेपालले आफ्नो दोस्रो खेलमा स्कटल्याण्ड, तेस्रो खेलमा अफगानिस्तान र चौथो तथा समूह चरणको अन्तिम खेलमा हङकङ्सँग प्रतिस्पर्धा गर्ने छ । दुबै समुहका शीर्ष तीन स्थानमा रहने राष्ट्र सुपरसिक्स चरणमा प्रवेश गर्नेछन् ।
