काठमाडौं ,१९ फागुन ।
राष्ट्रिय क्रिकेट टोलीका कप्तान पारस खड्काले विश्वकप छनोट प्रतियोगिता नेपालका लागि सुनौलो अवसर भएकाले उच्च मनोवलका साथ लक्ष्य अनुरुपको खेल प्रदर्शन गर्ने बताएका छन् ।
प्रतियोगिता सुरु हुनु पुर्व अन्तर्रा्ष्ट्रिय क्रिकेट काउन्सिल आईसीसीसँंग कुरा गर्दै कप्तान खड्काले कम्तीमा सुपर सिक्समा पुग्ने लक्ष्यका साथ टोली जिम्बाबे आएको बताए ।
कप्तान खड्काले नेपाली क्रिकेटको भविष्य समेत निर्धारण गर्ने भएकाले पनि सोही अनुसार नेपाली टोलीले मिहेनत गरेको बताएका छन् ।
प्रतियोगितामा सहभागी सबै टोली उत्कृष्ट रहेको भन्दै उनले ती राष्ट्रलाई चुनौती दिन नेपाली टोली मानसिक रुपमै तयार रहेको स्पष्ट पारे ।
नामिबियामा भर्खरै सम्पन्न डिभिजन टु को शीर्ष दुईमा रहदै विश्वकप छनोटमा प्रवेश गरेकाले नेपाली टोलीको मनोबल उच्च रहेको खड्काको भनाई छ ।
टोलीको समर्थनमा लाखौँ नेपाली समेत रहेको उल्लेख गर्दै कप्तान खड्काले यो पटक पनि उनीहरुलाई निराश नपार्ने प्रयास गर्ने उल्लेख गरेका छन् ।
आसन्न एकदिवसीय विश्वकप क्रिकेटमा प्रवेश गर्ने क्षमता नेपाली टोलीमा रहेको भन्दै उनले राम्रो क्रिकेट खेलेर विश्वको ध्यान तान्न, छनोट प्रतियोगिता कोशेढुङ्गा साबित हुने समेत बताएका छन् । भोलिबाट सुरु हुने प्रतियोगिताको उद्घाटन खेलमा नेपालले घरेलु टोलीसँग प्रतिस्पर्धा गर्दै छनोटको सुरुवात गर्नेछ ।
