काठमाडौं, फागुन १७ । जिम्बाब्वेमा हुने आइसीसी एक दिवसीय विश्वकप क्रिकेट छनोट प्रतियोगिताअघिको नेपालको दोस्रो अभ्यास खेल स्थगित भएको छ ।
बर्षाका कारण आज हङकङसँग हुने अभ्यास खेल स्थगित भएको हो ।
वर्षाले गर्दा टससमेत हुन नसकेपछि खेल एक बल पनि नखेली स्थगित भएको हो ।
यसअघि, पहिलो अभ्यास खेलमा पनि वर्षा बाधकपछि खेल २९ ओभरमा झारेर नेपालले युएईसँग खेलेको थियो । युएईविरुद्ध नेपाल ५ विकेटले विजयी भएको थियो ।
१० राष्ट्र सहभागी विश्वकप छनोट प्रतियोगितामा समूह ‘बी’मा रहेको नेपालसँगै आयोजक जिम्बाब्वे, अफगानिस्तान, स्कटल्यान्ड र हङकङ रहेका छन् ।
अर्को समूहमा वेस्ट इन्डिज, नेदरल्यान्ड्स, पपुवा न्यूगिनी, युएई र आयरल्यान्ड छन् । हरेक समूहका उत्कृष्ट तीन टोली ‘सुपर सिक्स’मा पुग्नेछन् ।
फाइनल पुग्ने दुई टोली अर्को वर्ष इंग्ल्यान्डमा हुने विश्वकप क्रिकेटमा छानिनेछन् ।
यसैगरी, शीर्ष तीन स्थानमा पर्न सफल एसोसिएट राष्ट्रले आगामी चार वर्षका लागि एक दिवसीय क्रिकेट राष्ट्रको मान्यता पाउनेछन् ।
