काठमाडौं ,३ फागुन ।
नामिबियामा भइरहेको आइसीसी विश्व क्रिकेट लिग डिभिजन टू को फाइनलमा युएईले नेपाललाई जितका लागि २७८ रनको लक्ष्य दिएको छ ।
विन्डहोकस्थित वन्डर्रस क्रिकेट मैदान टस जितेर पहिले ब्याटिङ गरेको युएईले पुरै ५० ओभर खेल्दै ४ विकेट गुमाएर २७७ रन बनाएको हो ।
युएईका लागि ओपनर अस्फाक अहमेदले शतकिय पारी खेले। उनले १२३ बल खेल्दै १० चौका र ३ छक्काको मद्दतमा ११४ रन बनाए।
अस्फाकले पहिलो विकेटका लागि कप्तान रोहन मुस्ताफासँग १०९ रनको साझेदारी गरेका थिए। मुस्ताफाले ५१ रन बनाए। यस्तै साइमन खनवरले ४० रन जोडे। रमिद शहजाद ४१ रनमा नटआउट रहे।
बलिङमा नेपालका लागि सोमपाल कामी, बसन्त रेग्मी, सन्दीप लामिछानेले १– १ विकेट लिए।
लिग चरणको खेलमा नेपालले युएईलाई ४ विकेटले पराजित गरेको थियो।
नेपालले अहिले जवाफी ब्याटिङ गरिरहेको छ ।
दुवै टिम शिर्ष २ मा स्थान बनाउदै विश्वकप छनोट चरणमा पुगिसकेका छन् ।
जिम्वावेमा मार्च ४ तारिखबाट हुने विश्वकप छनोटमा वेस्ट इन्डिज, जिम्बाबे, अफगानिस्तान, आयरल्याण्ड, स्कटल्याण्ड, नेदरल्याण्ड, पपुवा न्युगिनी, हंगकंग, नेपाल र युएईले प्रतिस्पर्धा गर्नेछन ।
