काठमाडौ १२ माघ ।
नेपाली क्रिकेटको विवाद समाधानका लागि छलफल गर्न अन्तर्राष्ट्रिय क्रिकेट परिषद आईसीसीको टोली भोलि नेपाल आउने भएको छ ।
आगामी फेब्रुअरी महिनामा आईसीसीको बोर्ड बैठक बस्ने भएकाले विवाद समाधानको अन्तिम प्रयास गर्न टोली काठमाडौं आउन लागेको हो ।
आईसीसीका कार्यवाहक प्रमुख ईमरान ख्वाजा नेतृत्वको टोलीले आईतबार सल्लाहकार समितिसँग छलफल गर्ने कार्यक्रम छ ।
देशभित्रैबाट विवाद समाधानको पहल गर्न आईसीसीले ८ सदस्यीय सल्लाहकार समिति बनाए पनि उक्त समितिले प्रभावकारी रुपमा काम गर्न सकेको छैन ।
समितिकै अग्रसरतामा क्यानको नयाँ विधान मस्यौदा गरिए पनि एक पक्षको सहमति बिना विधानमा संशोधन गरेपछि आईसीसीले त्यसलाई अस्वीकार गरेको थियो ।
आईसीसीले निलम्बित क्यान पुनर्गठन गर्न चित्तबुझ्दो कारण र आधार पेश गर्न दिएको मध्य डिसेम्बरसम्मको समय पनि सकिसकेको छ ।
यो भ्रमणमा समेत सहमति जुट्न नसके आइसिसीको आगामी बैठकले क्यानको सदस्यता खारेज गर्नेसम्मको चेतावनी यसअघि नै दिईसकेको छ ।
