काठमाडौँ, २० पुस । नेपाल सिन क्योकुसिन कराते संघले जापानमा भएको तेस्रो सिजुका अन्तर्राष्ट्रिय फ्रेण्डसिप सिन क्योकुसिन कराते खुला प्रतियोगितामा विजेता खेलाडीलाई आज सम्मान गरेको छ ।
सातदोबाटोस्थित अन्तर्राष्ट्रिय खेल परिसरमा आयोजित कार्यक्रममा उक्त प्रतियोगितामा उत्कृष्ट घोषित खेलाडी रामहरि आलेमगर, रजतपदक विजेता डिसान तामाङ र प्रशिक्षक कुमार श्रेष्ठलाई राष्ट्रिय खेलकुद परिषद् (राखेप)का सदस्य सचिव केशवकुमार विष्टले सम्मान गर्नुभयो ।
प्रतियोगितामा नेपालको तर्फबाट आलेमगरले ७० केजीमाथि तौल समूहमा जापानका खेलाडीलाई पराजित गर्दै उत्कृष्ट खेलाडी चुनिएका हुन् । त्यसैगरी, तामाङले १५ वर्षमुनि उमेर समूहको फाइनल खेलमा जापानका खेलाडीसँग पराजित भई रजत पदकमा चित्त बुझाएका थिए ।
कार्यक्रममा सदस्य सचिव विष्टले जापान जस्तो विकसित मुलुकमा गएर उपाधि ल्याउनु सामान्य करा नभएको बताउनुभयो । उहाँले अन्तर्राष्ट्रिय मुलुकमा नेपाललाई चिनाउने सवैभन्दा उपयुक्त माध्यम खेलकुद भएको बताउँदै यस किसिमको सम्मानले खेलाडीलाई अगाडि बढ्न अझ प्रेरित गर्ने बताउनुभयो ।
गत अक्टोबर २७ र २८ तारिखमा जापानको सुजोवका सहरमा सम्पन्न उक्त प्रतियोगितामा विभिन्न २६ राष्ट्रका खेलाडीले भाग लिएका थिए ।
