काठमाडौं, पुष ५ ।
भैरहवा ग्लाडिएटर्सले एभरेष्ट प्रिमियर लिग इपीएलमा विजयी सुरुवात गर्दा काठमाडौं किंग्स एलेभेनले लगातार दोस्रो हार बेहोरेको छ ।
आज भएको दोस्रो खेलमा भैरहवाले काठमाडौंलाई ७ विकेटले पराजित गरेको हो । जारी प्रतियोगितामा भैरहवाले पहिलो खेलमै जित हात पारेको हो । यता उद्घाटन खेलमा ललितपुर प्याट्रिओट्ससँग पराजित भएको काठमाडौंको यो लगातार दोस्रो हार हो ।
भैरहवाको जितमा भारतीय खेलाडी पुनित विस्टले २८ बल खेलेर ६ चौकाको मद्दतमा नटआउट ४२ रन बनाए । यस्तै शरद भेषावकरले ३२ तथा हरीशैकर शाहले १४ रनको योगदान गरे। आरिफ शेख २३ रनमा नटआउट रहे । ११ बल खेलेका आरिफले ३ चौका र १ छक्का प्रहार गरे े।
त्यसअघि कीर्तिपुरस्थित टीयू मैदानमा टस जितेर पहिले ब्याटिङ गरेको काठमाडौं किंग्स एलेभेनले निर्धा्रित २० ओभरमा ८ विकेट गुमाएर ११८ रन बनाएको थियो। काठमाडौंका लागि ओपनर अमित श्रेष्ठले सर्वा्धिक २९ रन बनाए । यस्तै सागर कुमारले २८, राजु रिजालले २२ तथा सागर पुनले १९ रन जोडे। अन्य खेलाडीले दोहोरो हंक छुन सकेनन् ।
भैरहवाका दीपेश श्रेष्ठले ३ तथा कप्तान शरद भेषावकरले २ विकेट लिए। १४औँ ओभरमा मात्र आफ्नो स्पेश सुरु गरेका दीपेशले ३ ओभर बलिङ गर्दै १६ रन खर्चे।
