कैलाली, पुस ३ । पीएफए अत्तरीया र न्यू बुद्ध युवा क्लब फूलबारी धनगढीमा जारी ग्यालेक्सी पब्लिक स्कुल फारवेस्ट पशुपति कप फुटबल प्रतियोगिताको सेमिफाइनलमा प्रवेश गरेका छन् ।
धनगढी रंगशालामा सोमबार भएका क्वार्टरफाइनल खेलमा जित हासिल गर्दै अत्तरीया र फूलबारी अन्तिम चारमा पुगेका हुन् ।
सोमबार भएकोे पहिलो क्वार्टरफाइनलमा पीएफए अत्तरीयाले आयोजक फारवेस्ट पशुपति युवा क्लब ‘बी’लाई ४—० ले पराजित गर्यो ।
मणिराम चौधरीको ह्याट्रिकको मद्दतमा अत्तरीयाले सहज जित दर्ता गरेको हो । मणिरामले खेलको १३औं, ३५औं र ६९औं मिनेटमा गोल गर्दै ह्याट्रिक पूरा गरे । अत्तरीयाका लागि अर्को एक गोल १७औं मिनेटमा विशाल राईले गरे । चौधरी ‘म्यान अफ द म्याच’ घोषित भए ।
यस्तै, सोमबारै भएको दोस्रो क्वार्टरफाइनलमा न्यू बुद्ध युवा क्लब फूलवारीले फारवेस्ट अत्तरीया स्पोर्टस् एकेडेमीलाई ‘टाइब्रेकर’मा ५—४ ले हरायो ।
निर्धारित् र थप गरिएको समयमा पनि दुवै टिमबाट कुनै गोल हुन नसकेपछि पेनाल्टी सुटआउटमा फूलबारी सफल भएको हो ।
मंसिर २८ गतेदेखि सुरु भएको प्रतियोगिता पुस ८ गतेसम्म सन्चालन हुनेछ ।
प्रतियोगिताको विजेताले तीन लाख र उपविजेताले डेढ लाख रुपैयाँ पुरस्कार पाउनेछ ।
