काठमाडौं, मंसिर ५ ।
थाइल्याण्डको बंैककमा जारी ट्वेन्टी–ट्वेन्टी महिला विश्वकप क्रिकेटको एशियाली छनौटमा नेपालले आज हङकङसँग पनि अंक बाँडेको छ ।
बैंककमा पानी परेर खेल हुन नसकेपछि हङकङ र नेपालले समान १–१ अंक बाँडेका हुन् । वर्षाले खेल रोकेपछि नेपालले पहिलो खेलमा हिजो घरेलु टोली थाइल्याण्डसँग पनि अंक बाँडेको थियो ।
६ टिम सहभागी प्रतियोगितामा राउन्ड रोविन लिगका आधारमा खेल हुने छ । आजको खेलमा पनि अंक बाँड्न बाध्य भएपछि नेपालको दुई खेलबाट २ अंक मात्र भएको छ ।
हिजो मलेसियालाई हराएको हङकङको भने ३ अंक छ । नेपालले अब तेस्रो खेलमा आगामी बिहीबार युएईसँग, चौथो खेलमा शुक्रबार मलेसियासँग र अन्तिम खेलमा आइतबार चीनसँग प्रतिस्पर्धा गर्नेछ ।
राउन्ड रोविन लिगका आधारमा हुने प्रतियोगिताका शीर्ष दुई टोलीले नेदरल्याण्ड्समा हुने ट्वेन्टी ट्वेन्टी विश्वकपको छनौट खेल खेल्न पाउने छन् ।
