काठमाडौं, कात्तिक २८ ।
उन्नाइस वर्षमुनिको एसिया कप क्रिकेट अन्तर्गत आज भएको खेलमा नेपालले मलेसियाबिरुद्ध सानदार जित निकालेको छ ।
मलेसियाको क्वालाम्पुरमा वर्षा भएपछि २४ ओभरमा घटाईएको खेलमा नेपालले मलेसिायालाई ८ विकेटले पराजित गर्यो । नेपालले पाएको ४६ रनको सामान्य लक्ष्य ५ ओभर ३ बलमा २ विकेट गुमाएर पुरा गरेको हो ।
नेपालको जितमा अनिल साहको अविजित २६ रन महत्वपूर्ण रह्यो । १५ बल सामना गरेका साहले ३ छक्का र एक चौका प्रहार गरे । यसैगरी १२ रन जोडेका कप्तान दिपेन्द्र सिंह ऐरीले दुई छक्का प्रहार गरे ।
वर्षाले झण्डै ५ घण्टा ढिलो सुरु भएको खेलमा आयोजक मलेसियाले टस हारेर पहिले व्याटिङ गरेको थियो ।
१५ ओभर ३ बल मात्रै क्रिजमा टिकेको मलेसियालाई ४५ रनमै समेट्न नेपालका सन्दिप लामिछानेले ५ विकेट लिए । यसैगरी शहाब आलम र दिपेन्द्र सिंह ऐरीले २र२ विकेट झारे ।
