काठमाडौं, कात्तिक १८ ।
कीर्गिस्तानमा जारी एएफसी यु–१९ छनोट च्याम्पियनसिप फुटबलमा नेपालले लगातार तेस्रो हार व्यहोरेको छ । बिस्केकको मैदानमा भएको आज(शनिवार)नेपाल तेस्रो खेलमा युएईसँग १–० को हार व्यहोर्न बाध्य भएको हो ।
यसअघि भएको पहिलो खेलमा आयोजक कीर्गिस्तानसँग २–० ले तथा दोस्रो खेलमा बहराइनसँग ४–० ले पराजित भएको थियो ।
युएईविरुद्धको खेलको अन्तिम समयमा पाएको पेनाल्टी अवसरलाई गोलमा परिणत गर्न नसकेपछि नेपालले हारको सामना गर्नुपरेको हो ।
अभिषेक रिजालले पेनाल्टी प्रहारलाई गोलमा परिणत गर्न नसक्दा नेपालले बराबरी गर्ने सुन्दर अवसर खेरफालेको थियो ।
यसअघि, ७१ मिनेटसम्म गोल नखाएको नेपालले ७२औं मिनेटमा गोल खाँदै पराजय व्यहोरेको हो ।
कप्तान अर्पण कार्की हटाइएपछि कप्तानी सम्हालेका गोलकिपर सोजित गुरुङले युएईका गोल गर्ने आधादर्जन अवसरलाई निस्तेज पारेका थिए ।
नेपालले अब समूहको अन्तिम खेलमा बुधबार ओमानसँग खेल्नेछ ।
समूहको शीर्ष स्थानमा रहने टोली तथा उपविजेतामध्येका उत्कृष्ट पाँच टिमले फाइनल चरणमा प्रवेश पाउनेछन् ।
