काठमाडौं ,१६ कार्तिक ।
एसीसी अण्डर १९ एसियाकप क्रिकेटको तयारीका क्रममा बंगलादेशमा रहेको नेपाली किशोर टोली पहिलो अभ्यास खेलमा बंगलादेशसँग ३ विकेटले पराजित भएको छ ।
ढाकास्थित बीकेएसपी मैदानमा आज भएको खेलमा कमजोर ब्याटिङ प्रदर्शन गरेको नेपाली टोली बंगलादेशको अण्डर १९ टोलीसँग ३ विकेटले पराजित भएको हो ।
नेपालले दिएको १ सय ५४ रनको लक्ष्य बंगलादेशले ३९ ओभरमा ७ विकेट गुमाएर भेट्टाएको हो । उसको जितमा नइम शेखले ५३ र तौहिद रिड्लीले ४८ रनको योगदान गरे । सन्दीप लामिछानेले ४ तथा पवन सरार्फ र सहाब आलमले समान एक विकेट लिएपनि बंगलादेशलाई सस्तैमा समेट्न भने सकेनन् ।
यसअघि टस जितेर बंगलादेशले पहिले फिल्डिङ रोजेपछि व्याटिङ्ग गरेको नेपालले पुरा ओभर खेल्दै. ९ विकेटको क्षतिमा १ सय ५३.रन बनाएको हो ।
नेपालका लागी आसिफ शेखले सर्वा्धिक ३२ र भीम सार्किले २८ बनाउनु बाहेक अन्यको प्रदर्शन उल्लेख्य हुन सकेन । कप्तान दिपेन्द्र सिंह ऐरी १६, कमल सिंह ऐरी १७, अनिलकुमार साह १८ र पवन सरार्फ १९ रनमा आउट भए । नेपाली ईनिङ्गस् धरासायी पार्न बंगलादेशका काजी अनिक ईश्लाम र हसन महमुदले समान ३ विकेट लिए ।
नोभेम्बर ११ देखी २० सम्म मलेसियामा हुने प्रतियोगीताको तयारीका लागी साताब्यापी अभ्यास खेल्न नेपाली टोली बंगलादेश गएको हो ।
बंगलादेश भ्रमणका क्रममा नेपालले ३ म्याचको मैत्रीपुर्ण वान डे सिरिज खेल्नेछ । एसिया कप क्रिकेटको समुह एमा रहेको नेपालले बंगलादेश, भारत र आयोजक मलेसियासँग प्रतिस्पर्धा गर्नेछ ।
