एजेन्सी, कात्तिक १२।
इंग्लिस प्रिमियर लिग फुटबल अन्तर्गत गएराति भएको खेलमा आर्सनल, चेल्सी र लिभरपुल विजयी भएका छन् । घरेलु मैदानमा भएको खेलमा आर्सनलले स्वान्सी सिटीलाई २–१ ले पराजित गराएको हो ।
खेलमा अग्रता भने स्वान्सीले लिएको थियो । खेलको २२ औं मिनेटमा क्यालुकासले गोल गर्दै स्वान्सीलाई अग्रता दिलाएका हुन् । पहिलो हाफमा १–० ले पछि परेको आर्सनलका लागि ५१ औं मिनेटमा कोलासिनाकले बराबरी गोल गरे ।
त्यसको सात मिनेटपछि आरोन रामसीले गोल गर्दै आर्सनललाई २–१ को महत्वपूर्ण जित दिलाएका हुन् । जितपछि १० खेलबाट १९ अंक जोडेको आर्सनल पाँचौं स्थानमा कायम छ ।
अर्को खेलमा चेल्सीले बोर्नमाउथलाई १–० ले पराजित गरेको छ । पहिलो हाफमा गोलरहित बराबरी भएको खेलमा चेल्सीका लागि ५१ औं मिनेटमा इडन हजार्डले विजयी गोल गरे । जितपछि १० खेलबाट १९ अंक भएको चेल्सी चौथो स्थानमा कायम छ ।
यस्तै राति नै भएको खेलमा लिभरपुलले हडल्र्स्फिल्डलाई ३–० ले हरायो । लिभरपुलको जितमा ५० औं मिनेटमा ड्यानियल स्टुरेज, ५८ औं मिनेटमा रोबर्टो फिरमिनो र ७५ औं मिनेटमा विज्नाल्डमले गोल गरे ।
जितपछि १० खेलबाट १६ अंक जोडेको लिभरपुल छैटौं स्थानमा उक्लिएको छ । राति नै भएको खेलमा स्टोक सिटीले वाट्फोर्डलाई १–० ले हरायो । क्रिष्टल प्यालेस र वेष्ट ह्यामले २–२ को बराबरी खेल्दै अंक बाँडेका छन् ।
