काठमाडौं ,११ कार्तिक ।
किर्गिस्तानमा हुने एएफसी अण्डर १९ च्याम्पियनसिप फुटबलको छनोटका लागि अपर्ण कार्कीको कप्तानीमा नेपाली युवा टोलीको घोषणा गरिएको छ ।
मुख्य प्रशिक्षक छिरिङ लोप्साङ, प्रशिक्षकहरु पुष्कर शाही र मृगेन्द्र मिश्र सम्मिलित छनोट समितिले कार्कीको कप्तानीमा २३ सदस्यीय टोलीको चयन गरेको हो ।
आगामी मंगलबारबाट शुरु हुने छनोट प्रतियोगिताको समूह ए मा आयोजक किर्गिस्तान, बहराइन, ओमान, संयुक्त अरब इमरेट्स र नेपाल छन् । मंगलबार नेपालले किर्गिस्तानको सामना गर्नेछ ।
कार्तिक १६ मा बहराइन, १८ गते संयुक्त अरब इमरेट्स र २० गते ओमनसँग नेपालले प्रतिस्पर्धा गर्नेछ । समूहको विजेता र ११ समूहका ५ उत्कृष्ट उपविजेताले फाइनल चरणमा स्थान पक्का गर्नेछन् ।
टोलीमा प्रिजेन तामाङ उपकप्तान, अभिषेक बराल, विश्वास उदास, असिम भुसाल, विकास खवास, राजन गुरुङ, सुमन अर्याल, निराजन महर्जन, रोमन लिम्बु, अशोक थापा र दिनेश हेन्जन छन् ।
त्यस्तै अभिषेक रिजाल, अनिल महर्जन, सेसेहाङ आङदेम्बे, आकाश श्रेष्ठ, अरिक बिष्ट, रेजिन सुब्बा, धिरज श्रेष्ठ, सुरज ठकुरी, राजेश परियार, मनिष थापा र सोजित गुरुङ पनि टिममा अटाएका छन् ।
