गोरखा, २१ चैत ।
खाद्य सुरक्षा तथा जीविकोपार्जन कार्यक्रमअन्तर्गत गोरखाको सुलिकोट गाउँपालिका–२ स्थित बारपाकमा कृषि उपज सङ्कलन केन्द्र निर्माण गरिएको छ ।
केयर नेपालले स्वाँरा सघन गाउँ विकास केन्द्रको सहकार्यमा १५ लाख २४ हजार सात सय ६७ लगानी गरी भवन निर्माण गरेको हो ।
केयर नेपालका खाद्य सुरक्षा तथा जीविकोपार्जन अधिकृत लेखनाथ अधिकारीले कृषि उपज सङ्कलन गरी केन्द्र स्थापना भएपछि कृषकलाई भण्डारण गर्ने र बजारीकरण गर्न सहज हुने बताउनुभयो ।
भूकम्पपछि भूकम्पपीडितको जीविकोपार्जनमा सुधार ल्याउन तरकारीका बीउ वितरण गर्नेदेखि बेमौसमी तरकारी खेतीका लागि टनेललगायत सहयोग गरिएको केयरले जनाएको छ ।
यस्तै केयरले स्वाँरा सघन गाउँ विकास केन्द्रको समन्वयमा धार्चे गाउँपालिका–५ गुम्दामा आलुको बीउ भण्डारण गर्ने रस्टिक स्टोर भवन पुनर्निर्माण गरेको छ ।
जिल्ला कृषि विकास कार्यालयसँग समन्वय गरी निर्माण गरिएको भवनमा आलुको बीउ भण्डारण गर्ने बताइएको छ ।
