भक्तपुर, १ चैत । जिल्ला कृषि विकास कार्यालयले तीन कृषकलाई राष्ट्रपति उत्कृष्ट कृषक पुरस्कार प्रदान गरेको छ ।
नगरकोट नगरपालिका–८ खरिपाटीका कोमलप्रसाद तिमिल्सिना तथा चाँगुनारायण नगरपालिका–१७ झोखेलका प्रदीपराज पन्त र कृष्णजन्म दुवाललाई जनही रु १० हजार सहित पुरस्कृत गरेको हो
आज एक कार्यक्रमको आयोजना गरि कृषि विकास राज्यमन्त्री राधिका तामाङले तीनै जनालाई पुरस्कृत गर्नुभएको हो । तिमिल्सिनाले १५ रोपनी जग्गामा फलफूलखेती, पन्तले अर्गानिक तरकारीखेती र पशुपालन तथा दुवालले १८ रोपनी क्षेत्रफलमा तरकारी उत्पादन गर्दै आएका छन् ।
कार्यक्रममा कृषि मन्त्रालयका सहसचिव सुरेशबाबु तिवारी र स्थानीय विकास अधिकारी द्रोण पोखरेल, मध्यमाञ्चल क्षेत्रीय कृषि निर्देशक मीनप्रसाद बुढाथोकी, जिल्ला कृषि विकास कार्यालयका प्रमुख पूर्ण ढुङ्गानाले आवश्यकता पहिचान गरेर अनुदान वा कृषि सामग्री वितरण गर्न सके मात्र सरकारी बजेटको प्रभावकारिता बढ्ने बताउनुभयो ।
