म्याग्दी, १७ पुस । म्याग्दीको भकिम्ली–२ छेपारेमा रहेको मिलीजुली कृषक समूहले कृषक हितकोष स्थापना गरेका छन् ।
समूहमा आबद्ध १६ जना कृषकले मासिक रुपमा बचत सङ्कलन र सामूहिक तरकारीखेती मार्फत जम्मा भएको एक लाख रुपैयाँको कृषक हितकोष स्थापना गरेको हो ।
कोषमार्फत विपन्न समुदायका कृषकलाई मलबीउ खरिदका लागि सहुलियत ब्याजदरमा रकम उपलब्ध गराउने गरिएको सदस्य रुद्र श्रीसले जानकारी दिनुभयो ।
कोषबाट हाल सात जनाले वार्षिक १ प्रतिशत ब्याजदरमा ऋण लगेका छन् ।
एक जनालाई एक पटकमा रु पाँच हजारदेखि रु दश हजारसम्म ऋण उपलब्ध गराउने गरिएको छ । उनीहरुले मासिक रुपमा बस्ने बैठकमा प्रतिव्यक्ति रु ५० का दरले समूहमा बचत गर्छन् ।
सो समूहमार्फत छेपारेमा तीन रोपनी जग्गा भाडामा लिएर सामूहिक तरकारीखेती समेत गरिएको छ । समूहको कोष वृद्धि, अनुभव आदानप्रदान र व्यावसायिक तरकारी खेतीतर्फ आकर्षण गर्न सामूहिक तरकारीखेती गरिएको श्रीसले बताउनुभयो । वार्षिक पाँच हजार रुपैया भाडा तिर्ने गरी जग्गा भाडामा लिइएका हो ।
एक याममा तरकारी बेचेर ३० हजार रुपैयाँसम्म आम्दानी गरेका उनीहरुले खर्च कटाएर पन्ध्र हजार हितकोषमा बचत गरेका छन् । सो जग्गामा उनीहरुले बन्दा, काउली, गोलभँेडालगायत मौसमी तथा बेमौसमी तरकारीखेती गर्ने गरेका छन् । समूहलाई जिल्ला कृषि विकास कार्यालयले ५० प्रतिशत अनुदानमा खनजोतमा प्रयोग हुने मिनीटिलर हलो उपलब्ध गराएको छ ।
