काठमाडौं, मंसिर ७ ।
भारतले प्रतिबन्ध लगाएको पाँच सय र हजारको नोट सटही गर्ने बारे आरबीआइले निर्णय दिन ढिलाइ गरेका कारण सटही प्रक्रिया अन्योलमा परेको छ ।
नोट सटहीका लागि प्रक्रिया र्पुयाएर प्रयास गरे तापनि भारतबाट ठोस निर्णय आउन ढिला भएको नेपाल राष्ट्र बैंकले जनाएको छ ।
नोट सटहीको लागि प्रयास भइरहेकाले नआत्तिन समेत राष्ट्र बैंकले आग्रह गरेको छ । तर नोट सटहीका लागि भइरहेको ढिलाइका कारण अन्यौलता भने थप चुलीदै गएको छ ।
यसैबीच भारत सरकारले पाँच सय र एक हजारको नोटमा प्रतिबन्ध लगाएपछि सीमावर्ती नेपाली बजारमा भारतबाट आयत हुने सामग्रीको अभाव देखिन थालेको छ ।
नोटमा लागेको प्रतिबन्धपछि सुदूरपश्चिमका पहाडी जिल्लामा भारतबाट आयत हुने सामग्रीको अभाव भएको हो । भारतसँग सीमा जोडिएका जिल्ला भएकाले बैतडीमा धेरैजसो सामान भारतबाट आयत हुने गर्दछ ।
भारतीय व्यापारीले पाँच सय र एक हजारका भारतीय नोटमा कारोबार बन्द गरेपछि आफूहरुलाई विभिन्न सामग्री ल्याउन समस्या भएको व्यपारीहरुको गुनासो छ ।
बैतडी तथा दार्चुलाका अधिकांश बजारमा भारतीय सीमावर्ती बजारबाट व्यापारीले सामान ल्याउने भएपनि नोट नचल्दा समस्या भएको हो ।
