काठमाडौं, कात्तिक २१। नेपाल विद्युत प्राधिकरणले काठमाडौं उपत्यकाका तिन जिल्लालाई परीक्षणको रुपमा लोडसेडिङ मुक्त गरेको छ । तिहार सुरु भएसँगै चौबीसै घण्टा बिजुली आपूर्ति गर्दै आएको प्राधिकरणले उपत्यकालाई लोडसेडिङमुक्त गर्न थालेको हो ।
प्राधिकरणले विद्युत् आपुर्ति प्रणालीमा सुधार गरेर उपत्यकाको तीन जिल्ला काठमाडौं, भक्तपुर र ललितपुरलाई लोडसेडिङमुक्त गर्न थालेको प्राधिकरणका कार्यकारी निर्देशक कुलमान घिसिङले जानकारी दिनुभयो । साथै उहाँले उपत्यकालाई लोडसेडिङमुक्त गर्दा अरु जिल्लाको विद्युत कटौती नहुने बताउनु भयो ।
भारतबाट थप विद्युत आयातका लागि धनुषाको ढल्केबरमा सवस्टेशन निर्माणको काम भइरहेको र ढल्केबर–खिम्ती, ढल्केबर–हेटौंडा र मातातीर्थको प्रसारण लाइन स्तरोन्नतिको काम पनि भइरहेको उहाँले जानकारी गराउनु भयो ।
विद्युत व्यवस्थापन गर्न अझै एक डेढ महिना लाग्ने र त्यसपछि काठमाडौं उपत्यकासहित काभ्रेको तीन शहरलाई पनि एकैपटक लोडसेडिङमुक्त शहर घोषणा गर्ने प्राधिकरणको योजना छ ।
त्यसपछि पोखरा, विराटनगर, धरान, चितवन लगायतका शहरलाई पनि क्रमैसँग लोडसेडिङमुक्त गर्दै लैजाने कार्यकारी निर्देशक घिसिङले बताउनुभयो ।
