काठमाण्डौ ८ कार्तिक
व्यवस्थापिका संसदको विकास समितिले २०७४ साल असोज भित्र बहुप्रतिक्षित मेलम्ची आयोजनाको काम सकेर काठमाण्डौमा पानी वितरण गर्न सम्वन्धित निकायलाई निर्देशन दिएको छ ।
समितिको सिंहदरबारमा आज बसेको बैठकले दुई पटक सम्म यसअघि नै आयोजना सम्पन्न गर्ने मिति तय भईसकेको भन्दै अब समय थप गर्नेभन्दा पनि चाँडो काम सक्न खानेपानी तथा सरसफाई मन्त्रालय र मेलम्ची खानेपानी आयोजनालाई निर्देशन दिएको हो ।
कमजोर चट्टान बग्ने समस्याका कारण सुरुङ निर्माणमा अप्ठ्यारो भएको गुनासो आएकाले त्यसलाई गम्भिरतापूर्वक समाधान गर्न पनि समितिले निर्देशन दिएको छ ।
समिति सभापति रविन्द्र अधिकारीका अनुसार बैठकले स्थानीय प्रभावित जनताको भौतिक तथा आर्थिक लाभ सम्बन्धी निर्दे्शिका तयार गरि आयोजना स्थलसम्म पुग्ने सडकको तत्काल स्तरोन्नति गर्न पनि निर्देशन दिएको छ ।
आयोजनाले पाइप विच्छ्याउने कार्यले सडक सञ्चालनमा कठिनाई देखिएको भन्दै समितिले रातीको समयमा समेत काम गरी पानी वितरणको पूर्वाधारलाई छिटो सम्पन्न गर्न पनि निर्देशन दिईएको उहाले बताउनु भयो ।
बैठकमा मेलम्ची खानेपानी आयोजनाका प्रमुख घनश्याम भट्टराईले आयोजनाको ६२ प्रतिशत काम सकिएको जानकारी गराउनु भएके थियो ।
