काठमाण्डौ ,१ कात्तिक ।
वाणिज्य बैंकहरूले आजदेखि लागु हुनेगरि कर्जाको ब्याजदर पनि बढाउन थालेका छन् । दसैंअघि मुद्दती निक्षेपको ब्याज बढाएका बैंकहरुले पुँजीकोष लागत बढेको भन्दै कर्जाको ब्याज पनि बढाउन लागेका हुन् ।
दसैं बिदापछि कार्यालय खुलेकै दिन बैंकहरूले ऋणीलाई फोनमार्फत कर्जाको ब्याज कात्तिक १ देखि बढ्ने जानकारी दिएका छन् ।
बजार माग र आपूर्तिका आधारमा ब्याजदर घटबढ हुनु स्वाभाविक भए पनि एकैपटक सबै बैंकहरूले समान दरमा ब्याजदर बढाउनु अस्वाभाविक भएको उद्योगी व्यवसायीको गुनासो छ ।
उनीहरूका अनुसार अहिले बैंकहरूले अल्पकालीन प्रकृतिका आवधिक कर्जा (टीआर) को ब्याजदर १ देखि २ प्रतिशत सम्मले बढाएका छन् । सोहि बहाना देखाएर केही बैंकहरूले अन्य प्रकृतिका कर्जाको दर पनि सामान्य रूपमा बढाएका छन् ।
एकै दिन ३÷४ वटा बैंकले फोन गरेर कात्तिक १ गतेदेखि ब्याजदर बढ्ने सूचना दिएको नेपाल उद्योग वाणिज्य महासंघका अध्यक्ष पशुपति मुरारकाले बताउनु भयो ।
ब्याजदरमा घटबढ स्वाभाविक भए पनि सबै बैंकले एकै दिनदेखि समान दरले बढाउनु स्वाभाविक नभएको उहाको गुनासो छ ।
मुद्दती निक्षेप ८ प्रतिशतमाथि भएको अवस्थामा सामान्य रूपमा कर्जादर पनि बढाउन दबाब परेको नेपाल बैंकर्स संघका अध्यक्ष उपेन्द्र पौडेलले बताउनु भयो ।
दसैं र चालु आर्थिक वर्षको पहिलो त्रैमास अन्त्य भएकाले ब्याजदर वृद्धिका लागि यो समय उपयुक्त भएको उहाको तर्क छ ।
विगतमा सस्तो दरमा अल्पकालीन कर्जा प्रवाह गरेका बैंकहरूले निक्षेपको लागत बढेपछि अहिले व्यापारिक कर्जाको दर बढाउन थालेको भन्दै उहाले निक्षेपको ब्याज बढेसँगै कर्जाको दर बढ्नु स्वाभाविक भएको बताउनु भयो ।
बैंक तथा वित्तीय संस्थामा लगानीयोग्य रकम (अधिक तरलता) मा कमी आएसँगै निक्षेपको ब्याजदर बढेको छ । गत वर्षको तुलनामा अहिले निक्षेपको ब्याजदर करिब दोब्बरले बढेको छ ।
