काठमाण्डौ ,२१ असोज ।
साल्ट ट्रेडिङ कर्पोरेसन(एसटीसी)ले चाडपर्वको समयमा हुन सक्ने अभावलाई मध्यनजर गर्दै दसैंका लागि ५० हजार सिलिन्डर एलपी ग्यास स्टक राखेको छ ।
चाडपर्वको अवसरमा ग्यासको माग बढी हुने गरेकोले आपतकालीन अवस्थाका लागि ५० हजार सिलिन्डर स्टक राखिएको एसटीसी ग्यासका महाप्रबन्धक महेन्द्र भूसालले जानकारी दिनुभयो ।
कर्पोरेशनको जडिबुटी स्टोरबाट हाल दैनिक २५ सय सिलिन्डर ग्यास वितरण भइरहको छ ।
नाकाबन्दीका कारण आपूर्ति असहज बनेपछि गतवर्षको दशैंमा मुस्किलका ग्यास वितरण गरेको कर्पोरेसनले यसबर्षदेखि दैनिक उत्पादन समेत बढाएको भूसालले बताउनु भयो ।
यसअघि दैनिक २५ सय सिलिन्डर उत्पादन क्षमता रहेकोमा केही अघिदेखि दैनिक ५ हजार सिलिन्डर उत्पादन गर्न थालेको उहाले बताउनु भयो ।
गतबर्षको अभावलाई ख्याल गरेर सरकारले कर्पोरेसनलाई ४ सय ६७ टनबाट १ हजार ८ टन मासिक कोटा बृद्धि गर्न अनुमति दिएपछि उत्पादन बढाएको हो ।
कर्पोरेसनले आफ्नो उत्पादनको रुपमा नुन, चिनी, तेलसँगै एसटिसी ग्यास उत्पादन तथा बिक्री वितरण गर्दै आएको छ ।
दसैंलाई नै केन्द्रमा राखी कर्पोरेशनमार्फत बिक्री वितरण हुँदै आएको सामाग्रीमा खुद्रा व्यापारीलाई समेत प्रतिकेजी १ रुपियाँ पचास पैसा घटाएर उपलब्ध गराउँदै आएको भुषालले बताउनु भयो ।
