काठमाडौं ,१४ असाेज ।
ब्यावस्थापिक संसदले चालू आर्थिक वर्षको बजेटसँग सम्वन्धित विभिन्न तीन वटा विधेयक बहुमतले पारित गरेको छ ।
आर्थिक बर्ष सुरु भएको साढे २ महिनापछि हिजो सरकारले संसदमा प्रस्तुत गरेको विधेयक समान्य छलफल पछि संसदले आज पारित गरेको हो ।
हिजोको बैठकमा अर्थमन्त्री कृष्णबहादुर महराले पेस गरेको बजेट आश्रित आर्थिक विधेयक, ऋण तथा जमानत विधेयक र राष्ट्र ऋण उठाउने विधेयक दफावार छलफलपछि आज पारित भएको हो । ती विधेयकमाथि गत साउन पहिलो साता समेत संसदमा छलफल भएको थियो ।
विधेयकमाथिको छलफलका क्रममा एमाले सांसदहरुले गत साउन ७ गते संसदको बहुमतले अस्विकृत गरेका विधेयक बर्तमान सरकारले जस्ताको तस्तै ल्याउनुको कारण प्रष्ट पार्न सरकारसँग माग गरेका थिए ।
एमाले अध्यक्ष केपी ओली नेतृत्वको अघिल्लो सरकारले ल्याएका तीन वटै विधेयक सत्तागठबन्धनमा आएको परिवर्तनसँगै गत साउन ७ गतेको बहुमतले अस्वीकृत भएका थिए ।
संसदबाट ती विधेयक पारित भएसँगै अब चालू आर्थिक वर्षको पूर्ण बजेट पारित भएको छ । विनियोजन विधेयक भने संसदले आर्थिक बर्ष सुरु हुनु पूर्व नै पारित गरेको थियो ।
यस्तै आजको बैठकमा सहकारी तथा गरिबी निवारणमन्त्री ह्दयराम थानीले पेस गर्नुभएको सहकारी विधेयक, २०७३ माथि विचार गरियोस् भन्ने प्रस्ताव सर्वसम्मतीले स्वीकृत गरेको छ ।
